ٹیکنالوجی دے استعمال نال خصوصی لوکاں کوں سوکھ ݙیوݨ دی لوڑھ اے، صدر مملکت ڈاکٹر عارف علوی دا خطاب

اسلام آباد۔12دسمبر (اے پی پی) صدر مملکت ڈاکٹر عارف علوی ٹیکنالوجی دے استعمال نال خصوصی لوکاں کوں سوکھ ݙیوݨ دی لوڑھ تے زور ݙیندیں ہوئیں آکھیا جو بصارت توں محروم لوکاں کیتے وزارت صحت اہم کردار ادا کر سڳدی اے، فنی تربیت ݙے تے خصوصی لوکاں کوں معاشرے دا مفید رکن ٻݨایا ونڄ سڳدے۔ اے ڳالھیں انہاں منگل کوں ایوان صدر اچ بصارت توں محروم لوکاں کیتے مراکش ٹریٹی تے دستخط دی تقریب توں خطاب کریندیں ہوئیں آکھی۔ انہاں شہریاں تے زور ݙتا جو او بصارت توں محروم بندیاں سودھے خصوصی بندیاں دی فلاح تے بہبود کیتے آپݨا کردار ادا کرن اتے ایں بارے معاشرے اچ آپݨی مثبت ذمہ واریاں پوری کرن۔ صدرمملکت آکھیا جو نادرا اتے وزارت انسانی حقوق خصوصی لوکاں کوں بہترین خدمات ݙیندے پئن۔ صدرمملکت آکھیا جو مراکش نال معاہدہ اساں کیتے خوشی دی ڳالھ اے۔ انہاں آکھیا جو بصارت توں محروم لوکاں کیتے خصوصی چشمہ ٻݨایا ڳئے، چشمہ نابینا لوکاں کیتے ٹیکسٹ پڑھ سڳدے اتے لوکاں کوں سنڄاݨ سڳدے۔ ڈاکٹر عارف علوی آکھیا جو خصوصی لوکاں کوں تعلیم ݙیوݨ آلے استادیں کوں تربیت ݙتی ویندی پئی اے۔ معذوراں اتے خصوصی لوکاں کوں معاشرے اچ سوکھ ݙیوݨ دے نال نال انہاں کیتے مواقع پیدا کرݨ دی کوشش کیتی ونڄے۔ ایں توں پہلے صدرمملکت بصارت توں محروم لوکاں کیتے مراکش ٹریٹی تے دستخط کیتے۔ تقریب اچ خاتون اول بیگم ثمینہ علوی، سفارت کاراں، مخلتف شعبیاں توں تعلق رکھݨ آلی اہم شخصیات اتے بصارت توں محروم لوک شریک تھیے۔