عربی سیکھݨ ہر مسلمان سانڳے ضروری اے ، پاکستان اچ عربی ادب کوں ودھارا ݙیوݨ دی لوڑھ اے ، مددعلی سندھی

اسلام آباد۔13دسمبر(اے پی پی) وفاقی وزیر تعلیم و پیشہ وارانہ تربیت مدد علی سندھی آکھیے عربی سکھݨ ہر مسلمان سانڳے ضروری اے ، پاکستان اچ عربی ادب کوں ودھارا ݙیوݨ دی لوڑھ اے ۔ اے ڳالھ انہاں “20 ویں صدی دے ݙوجھے نصف اچ عربی ناول دے جدید رجحانات” دے موضوع تے علامہ اقبال اوپن یونیورسٹی اچ ݙو ݙینھ وار بین الاقوامی کانفرنس دے افتتاحی اجلاس توں خطاب اچ آکھی اے ۔کانفرنس توں خطاب کریندے ہوئیں وفاقی وزیر آکھیے جو علامہ اقبال اوپن یونیورسٹی اچ اے کانفرنس ھک منفرد اتے اہم ترین موضوع تے ہے جیں دے انعقاد تے میں یونیورسٹی دے وائس چانسلر اتے پوری ٹیم کوں مبارخ ݙینداں ۔ وفاقی وزیرآکھیے اے کانفرنس ٻہوں اہمیت رکھیندی اے تے باقی کانفرنساں توں بالکل منفرد اے،جدید عربی ناول توں ساݙے لوک واقف کائنی۔ ایں موقع تے خطاب کریندے ہوئیں یونیورسٹی دے وائس چانسلر پروفیسر ڈاکٹر ناصر محمود کانفرنس اچ شرکت تے وفاقی وزیر تعلیم دا شکریہ ادا کیتا۔انہاں آکھیے وفاقی وزیر تعلیم خود ھک جاݨی سنڄاتی علمی شخصیت ہن ، تحقیق اتے علم دے میدان اچ انہاں دا تعارف کہیں چیز دا محتاج کائنی ۔