قوم دا ساریں توں قیمتی اثاثہ ایندے انسانی وسائل ہن ،افرادی قوت کوں جدید بنیاداں تے فنی تربیت ویلھے دی لوڑھ اے ، نگران وزیراعظم انوار لحق کاکڑ دا  کوئٹہ اچ خطاب

کوئٹہ۔19دسمبر(اے پی پی):نگران وزیراعظم انوار الحق کاکڑآکھیے جو قوم دا ساریں توں قیمتی اثاثہ ایندے انسانی وسائل ہن ہنر مند افرادی قوت  دی ٻاہرلے ملکاں اچ ٻہوں لوڑھ اے ،دوست ملک اڄ وی پاکستان توں افرادی قوت دی درآمد کوں ترجیح ݙیندن،افرادی قوت کوں جدید بنیاداں تے فنی تربیت ویلھے دی لوڑھ اے ۔اے ڳالھ انہاں منڳل کوں اتھاں بلوچستان اچ پرائم منسٹر یوتھ سکل ڈویلپمنٹ پروگرام  دی تقریب توں خطاب کریندے ہوئیں آکھی اے ۔ تقریب توں خطاب کریندے ہوئیں نگران وزیراعظم آکھیے جو فنی مہارت دی اہمیت ویلھے دے نال بدلدی تے ودھدی پئی اے کہیں وی قوم دا ساریں توں قیمتی اثاثہ ایندے انسانی وسائل ہن ۔ہنر دے ودھارےتوں اے ویلیو ایڈڈ بݨ ویندے ۔عالمی مارکیٹ اتے معیشتاں اچ جیویں جدت آندی پئی اے ،نویں ٹیکنالوجیز آندیاں پئن ، آرٹیفیشل انٹیلیجنس دا دوردورہ اے،ایں سارے اچ جیڑھا چلینج درپیش اے اوایہو اے جو کیویں آپݨے انسانی وسائل کوں موثر بݨایا ونڄ سڳدے۔ انہاں دی کیویں تربیت کرݨی اے ۔ انہاں آکھیے جو ہنر مند افرادی قوت انفرادی اتے اجتماعی طور تے قوماں سانڳے سودمند ہوندی اے ۔کوشش اے جو گوادر توں موسی خیل تئیں ٻالاں کوں تربیت ݙتی ونڄے تاں جو او لوکاں سانڳے مفید شہری دے طور تے سامݨے آون ۔انہاں آکھیے اساکوں آپݨی ٹریننگز کوں جدید تقاضیں نال ہم آہنگ کرݨا ہوسی ۔خلیجی ملک،یورپ اتے چین اچ افرادی قوت  سانڳے وݙے موقع پم تاں جو ایندے اچ مزید ہنر مند افرادی قوت درکار اے۔ماضی اچ غیر ہنر مند لوکاں کوں ٻاہر بھجوایا ویندا ہئی جنہاں ساݙی معیشت کوں سہارا ݙتا تاں جو مستقبل اچ ہݨ شاید ممکن نہ ہووے جو غیر ہنر مند لوکاں کوں ٻاہر بھجوایا ونڄ سڳے ۔سعودی عرب، متحدہ عرب امارات ، کویت سودھے مختلف ملکاں نال ڳالھ مہاڑ تے جیں نتیجے تے میں پڄاں ،  اہاں دی اڄ وی ترجیح پاکستان توں افرادی قوت  گھنݨ اچ اے تاں جو جے انہاں دی معیشت  نال مطابقت رکھݨ آلی افرادی قوت اتھاں دستیاب نہ ہوسی تاں ول انہاں دی توجہ ٻئے ملکاں کنے ویسی اساں ایں مقابلے دی تیاری کرݨی اے ۔ انہاں آکھیے 8 فروری دے بعد جݙان ساݙی مدت پوری تھیسی تاں ایندے بعد وی ایں معاشرے اچ کہیں نہ کہیں حوالے ساݙا کردار ہوسی تے ایں کردار کوں بلوچستان  تے ایندے لوکاں دے مفاداچ  بھرپور اندازاچ استعمال کریسوں ۔ اے ھک مشن اے اتے اینکوں گھن تے ٹرسوں ۔ کوئٹہ اچ ایں پروگرام تے شرکت کرݨ تے خوشی تھیندی پئی اے ایندے اثرات لمبی مدت دے ہوسن ایندے نال لوکاں دیاں زندگیاں بدل ویسن۔  وزیراعظم  ایں موقع تے بلوچستان دے چار ہونہار طالب علماں کوں چیک ݙتے جنہاں اچ عینہ عروج،حفضہ عمران،مومنہ ایاز،ثمینہ مری شامل ہن ۔