اسلام آباد۔22دسمبر(اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو مالی، انتظامی اتے سیکورٹی دی اینڄھی کوئی صورتحال کائنی جو انتخابات اچ دیر تھیوے، انتخابات اپݨے مقررہ ویلھے تے 8 فروری کوں تھیسن، ساکوں چیف الیکشن کمشنر تے پورا اعتماد اے۔ اسلام آباد اچ میڈیا نال الیندے انہاں آکھیا جو پیمرا ایکٹ اچ صحافیاں کوں تحفظ ݙتا ڳئے، صحافیاں اتے میڈیا ورکرز کوں نوکریاں توں فارغ کرݨ افسوسناک اے، ایں بارے چیئرمین پیمرا نال الیسوں۔ انہاں آکھیا جو بلوچستان توں آئے مظاہرین نال الاوݨ کیتے ٻݨائی ڳئی کمیٹی اپݨا کم کریندی پئی اے، کوشش اے جو انہاں دے مسلے حل کروں، مظاہرین کوں بحفاظت گھر ٻھیڄݨ دی کوشش اے، ایں سانڳے گورنر بلوچستان وی آئے ہوئے ہین، معاملے تے کمیٹی وزیراعظم کوں اڄ رپورٹ پیش کریسی۔ انہاں آکھیا جو سیاسی جماعتاں دے اندرونی مسائل تے تبصرہ نسے کر سڳدے، کوشش اے جو انتخابات ویلھے تے تھیون اتے ساریاں سیاسی جماعتاں نال چنڳے تعلقات رکھوں۔
