پاکستان سٹارٹ اپ فنڈ دا اجرا کرݙتا ڳئے، حکومت ایں فنڈ کیتے ݙو بلین روپے رکھین، ڈاکٹر عمر سیف

اسلام آباد۔9جنوری  (اے پی پی) نگران وفاقی وزیر برائے انفارمیشن ٹیکنالوجی ڈاکٹر عمر سیف آکھیا جو پاکستان سٹارٹ اپ فنڈ دا اجرا کرݙتا ڳئے، حکومت ایں فنڈ کیتے ݙو بلین روپے رکھین، ایں فنڈ دا مقصد پاکستان اچ وینچر سرمایہ کاری تیز کرݨ اے، ایں فنڈ نال اسٹارٹ اپس کوں مالی تعاون ݙتا ویسی۔ اے ڳالھیں انہاں منگل کوں تقریب توں خطاب کریندیں ہوئیں آکھی۔ انہاں آکھیا جو سٹارٹ اپ فنڈ دے ذریعے ہر سٹارٹ اپ کوں 30 فی صد تعاون ݙتا ویسی جڈانجو وینچر کیپیٹلسٹ 70 فی صد سرمایہ کاری کریسی،سٹارٹ اپ فنڈ پاکستان دی معاشی ترقی اچ اہم کردار ادا کریسی۔ وزارت آئی ٹی سٹارٹ اپس کوں سہولت ݙیوݨ کیتے کوشاں اے۔ انہاں آکھیا جو گزریل چار سالیں اچ پاکستانی اسٹارٹ اپس اچ تقریبا 800 ملین ڈالرز ٻاہرلی سرمایہ کاری تھئی اے۔