عدلیہ مخالف مہم دی کہیں صورت اجازت نی ݙتی ونڄ سڳدی ، ایجھیاں سرگرمیاں اچ ملوث لوکاں دے خلاف آئین و قانون دے تحت کارروائی کیتی ویسی ، مرتضیٰ سولنگی

اسلام آباد۔22جنوری  (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے عدلیہ مخالف مہم دی کہیں صورت اجازت نی ݙتی ونڄ سڳدی ، ایجھیاں سرگرمیاں اچ ملوث لوکاں دے خلاف آئین و قانون دے تحت کارروائی کیتی ویسی ، کوڑ کھنڈاوݨ کجھ لوکاں دا کاروبار اے ، عوام ایجھھی غلط اتے کوڑیاں خبراں دی تصدیق ضرور کرن، اساکوں عدم برداشت اتے کوڑ دے کلچر دی حوصلہ شکنی کرݨی چاہیدی اے ۔ سنوار کوں اتھاں ایف آئی اے اتے پی ٹی اے حکام دے رلے پریس کانفرنس توں خطاب کریندے ہوئیں وفاقی وزیر اطلاعات آکھیے جو عدلیہ دے فیصلے عوام دی ملکیت ہوندن ، عدالت عظمیٰ دے 13 جنوری دے متفقہ فیصلے دے خلاف ملک دے اندر اتے ٻاہرلے ملک انتہائی گھٹیا اتے غلیظ مہم چلائی ڳئی جیں دی ساݙے ملک دے آئین اتے قانون اچ اجازت کائنی۔ انہاں آکھیے وزارت داخلہ 16 جنوری کوں ھک نوٹیفیکیشن دے تحت جوائنٹ انوسٹی گیشن ٹیم (جے آئی ٹی) بݨائی جیں اچ ایف آئی اے، پی ٹی اے سودھے وفاقی تحقیقاتی اداریں دے نمائندے شامل ہن، اے کمیٹی اپݨا کم کریندی پئی اے۔ وفاقی وزیر ایں موقع تے آئین دے آرٹیکل 19 دا حوالہ ݙتا جیں اچ آکھیا ڳئے جو اسلام دی عظمت یا پاکستان یا ایندے کہیں حصے دی سالمیت، سلامتی یا دفاع، غیر ملکاں نال دوستانہ تعلقات، امن عامہ، تہذیب یا اخلاق دے مفاد دے پیش نظر یا توہین عدالت ،کہیں جرم (دے ارتکاب) یا ایندی ترغیب متعلق قانون دے ذریعے لاتیاں ڳیاں مناسب پابندیاں دے تابع ہر شہری کوں تقریر اتے ڳالھ کرݨ دی آزادی دا حق ہوسی تے پریس دی آزادی ہوسی۔ مرتضیٰ سولنگی آکھیے اساکوں عدم برداشت اتے کوڑ دے کلچر دی حوصلہ شکنی کرݨی چاہیدی اے ۔ انہاں آکھیے ایف آئی اے اتے پی ٹی اے سودھے مجاز ادارے عدلیہ مخالف مہم جیہاں سرگرمیاں دے خلاف اپݨی کارروائی جاری رکھی ہوئی اے ، تحقیقات وی تھیندیاں پئن جݙاں جو ٻہوں سارے سوشل میڈیا اکائونٹس دی مانیٹرنگ کیتی ڳئی اے جنہاں دے خلاف کارروائی تھیسی۔ انہاں آکھیے میڈیا دے ذریعے ملک دے اندر تے ٻاہرلے ملک ایجھیاں سرگرمیاں اچ ملوث لوکاں کوں چتاوݨی ݙتی ویندی اے جو او ایہو سویاں سرگرمیاں توں باز آونڄن نتاں انہاں دے خلاف آئین تے قانون دے تحت کارروائی کیتی ویسی