صدر ڈاکٹر عارف علوی نال عوامی جمہوریہ چین دے نائب وزیر خارجہ سن ویڈونگ   دی ملاقات ، مختلف شعبیں اچ تعاون ودھاوݨ دی خواہش دا اعادہ

اسلام آباد۔22جنوری  (اے پی پی):صدر مملکت ڈاکٹر عارف علوی نال عوامی جمہوریہ چین دے نائب وزیر خارجہ سن ویڈونگ ملاقات کیتی جیں اچ پاکستان اتے چین دے سانجھے فیدے سانڳے معیشت، انفارمیشن ٹیکنالوجی، زراعت اتے انسانی وسائل دی ترقی دے شعبیں اچ تعاون ودھاوݨ دی خواہش دا اعادہ کیتا ڳئے ۔ پاکستان دے دورے تے آئے ہوئے چینی نائب وزیر خارجہ وفد دے رلے سنوار کوں اتھاں ایوان صدر اچ صدر مملکت نال ملاقات کیتی ، پاکستان اچ چین دے سفیر جیانگ زیڈونگ وی ملاقات اچ موجود ہن۔ ایوان صدر دے پریس ونگ موجب صدر مملکت وفد دا خیرمقدم کریندے ہوئیں آکھیے جو چین ھک ٻہوں عزیز دوست اے جیں ہمیشہ اوکھے ویلھے پاکستان دا ساتھ ݙتا۔  انہاں ایں ڳالھ تے روشنی پاتی جو سی پیک منصوبیں پاکستان دی توانائی دی لوڑھ کوں پورا کرݨ تے اقتصادی ترقی اچ وی اہم کردار ادا کیتے ۔ صدر آکھیے پاکستان سی پیک دی اعلیٰ معیار دی ترقی سانڳے پوری طرح پرعزم اے ، سی پیک دے اڳلے مرحلے اچ چین دا تعاون پاکستان دی صنعتی ترقی سانڳے اہم ہوسی ۔ انہاں آکھیے ݙوہیں دوست ملکاں وچال اقتصادی تعاون ݙوطرفہ تعلقات کوں مزید مستحکم کریسی ۔  انہاں پاکستان دی معیشت کوں مستحکم کرݨ اچ  چین دے تعاون دی تعریف کیتی ۔ صدر مملکت آکھیے پاکستان اپݨی سماجی و اقتصادی ترقی سانڳے آئی ٹی، تعلیم، صحت، زراعت اتے غربت مکاوݨ اچ دے شعبیں اچ چینی تجربات توں فیدہ چاوݨ چاہندے ۔ انہاں آکھیے پاکستان اتے چین مختلف علاقائی اتے بین الاقوامی معاملات تے ھکو سویں خیال رکھیندن تے مختلف فورمز تے تعاون کریندن ۔  انہاں ایں ڳالھ دا اعادہ کیتے جو پاکستان “ون چائنا” پالیسی، تائیوان، ہانگ کانگ، تبت، سنکیانگ اتے بحیرہ جنوبی چین سودھے سارے بنیادی مسئلیں تے چین دی حمایت جاری رکھیسی ۔ انہاں آکھیے جو پاکستان قومی ترقی اتے جموں و کشمیر جھیڑے تے ایندے اصولی موقف دی حمایت کرݨ تے چین دا شکر گزاراے۔ چین دے نائب وزیر خارجہ آکھیے  پاکستان اتے چین وچال دوستانہ تعلقات دی ھک پراݨی تاریخ اے جیڑھے جو تکڑے تھیندے رہسن ۔ انہاں آکھیے سی پیک دے  مثبت نتائج برآمد تھئن، انہاں مارچ 2020 اچ کووڈ۔19 دی وبا دے دوران چین دے دورے تے صدر پاکستان دا شکریہ ادا کریندے ہوئیں آکھیے جو چین نال اظہار یکجہتی سانڳے انہاں دی حمایت کوں ہمیشہ یاد رکھیا ویسی۔