تھیلیسیمیا کوں روکݨ سانڳے قوانین کوں بہتر کرݨا ہوسی،منو بھائی اپݨی پوری زندگی تھیلیسیمیا دے مریضاں سانڳے وقف کر رکھی ہئی،نگران وفاقی وزیر اطلاعات  ونشریات   مرتضی سولنگی

لاہور۔24جنوری(اے پی پی) نگران وفاقی وزیر اطلاعات،  نشریات و پارلیمانی امور مرتضی سولنگی تھیلیسیمیا دے مرض کوں روکݨ سانڳے شاندار خدمات تے منو بھائی( مرحوم) کوں خراج عقیدت پیش کریندے ہوئیں آکھیے جو منو بھائی اپݨی پوری زندگی تھیلیسیمیا دے مریضاں سانڳے وقف کر رکھی ہئی ، سندس فائونڈیشن دی بنیاد رکھ تے منو بھائی  ھک مثال قائم کیتی،تھیلیسیمیا روکݨ سانڳے قوانین کوں بہتر کرݨا ہوسی ۔ اے ڳالھ انہاں سندس فائونڈیشن دے اہتمام نال منو بھائی دے چھیویں ورھیݨے دی تقریب توں خطاب کریندے ہوئیں آکھی اے ۔ ایں موقع تے ڈائریکٹر سندس فائونڈیشن خالد عباس ڈار،صدر یاسین خان،سہیل وڑائچ،حفیظ اللہ خان نیازی، مجیب الرحمن شامی،صغری صدف تے بئے وی موجود ہن ۔وفاقی وزیر اطلاعات آکھیے منو بھائی دا پی ٹی وی  تے چلݨ آلا حالات حاضرہ دا پروگرام عوام اچ ٻہوں مقبول تھیا ،ایں پروگرام اچ منو بھائی بطور تجزیہ کار خدمات سر انجام ݙتیاں ،عوام حالی تئیں انہاں دے ایں پروگرام کوں یاد کریندن ۔انہاں آکھیے منو بھائی ھک چنڳے تے مخلص انسان ہن ، ،سندس فائونڈیشن اچ تھیلیسیمیا دے ٻالاں دے علاج سانڳے جیڑھا کم تھیندا پئے او تعریف دے قابل اے انہاں مزید آکھیے سندس فائونڈیشن اچ زیر علاج مریض منو بھائی دی مغفرت دا باعث بݨسین ۔وفاقی وزیر آکھیے تھیلیسیمیا روکݨ سانڳے احتیاطی تدابیر کوں اپناوݨا ہوسی ۔ ایں حوالے نال قوانین کوں بہتر  تے انہاں تے عمل درآمد کرݨا ہوسی ۔مرتضی سولنگی آکھیے جو اساں اڄ منو بھائی کوں خراج عقیدت پیش کرݨ تے اے عہد کرݨ سانڳے اتھاں کٹھے تھیوں جو منو بھائی انسانی خدمت دا جیڑھا جھنڈا اپݨے ہتھاں اچ چاتا ہئی اینکوں وٹھی رکھسوں ۔