اسلام آباد۔25جنوری (اے پی پی):نگران وزیراعظم انوار الحق کاکڑ آکھیے پاکستان دے توانائی دے شعبے اچ سعودی عرب دی سرمایہ کاری دا خیر مقدم کریندوں ، کراچی الیکٹرک دی طرفوں متبادل توانائی دے شعبے اچ سرمایہ کاری دی حکمت عملی خوش آئند اے جیں توں صارفین سانڳے بجلی دا ٹیرف گھٹ کرݨ اچ مدد ملسی۔ وزیراعظم آفس دے میڈیا ونگ توں جاری بیان موجب نگران وزیراعظم انوار الحق کاکڑ …
توانائی دے شعبے اچ سعودی عرب دی سرمایہ کاری دا خیر مقدم کریندوں، نگران وزیراعظم نال سعودی الجومیہ گروپ دے وفد دی ملاقات
اسلام آباد۔25جنوری (اے پی پی):نگران وزیراعظم انوار الحق کاکڑ آکھیے پاکستان دے توانائی دے شعبے اچ سعودی عرب دی سرمایہ کاری دا خیر مقدم کریندوں ، کراچی الیکٹرک دی طرفوں متبادل توانائی دے شعبے اچ سرمایہ کاری دی حکمت عملی خوش آئند اے جیں توں صارفین سانڳے بجلی دا ٹیرف گھٹ کرݨ اچ مدد ملسی۔ وزیراعظم آفس دے میڈیا ونگ توں جاری بیان موجب نگران وزیراعظم انوار الحق کاکڑ نال سعودی عرب دے الجومیہ گروپ دے سربراہ شیخ عبد العزیز حماد الجومیہ دی قیادت اچ چار رکنی وفد ملاقات کیتی۔ ایں موقع تے نگران وفاقی وزیر خزانہ ڈاکٹر شمشاد اختر اتے نگران وفاقی وزیر توانائی محمد علی اتے متعلقہ اعلیٰ سرکاری افسران وی موجود ہن ۔ الجومیہ گروپ کراچی الیکٹرک اچ وݙے پیمانے تے سرمایہ کاری کیتی اے ۔ نگران وزیراعظم وفد نال ڳالھ کریندے ہوئیں آکھیے پاکستان تے سعودی عرب وچال پراݨے برادرانہ تعلقات ہن جیڑھے جو ویلھے دے نال نال مزید تکڑے تھیندے پئن ، پاکستان اچ سعودی عرب دی سرمایہ کاری کوں قدر دی نگاہ نال ݙیکھدوں ، پاکستان دے توانائی دے شعبے اچ سعودی سرمایہ کاری دا خیر مقدم کریندوں ۔ ۔ وزیراعظم الجومیہ گروپ کوں پاکستان اچ متبادل توانائی دے شعبے اچ سرمایہ کاری دی ترغیب ݙتی۔ الجومیہ گروپ دے وفد کراچی الیکٹرک دے پراݨے مسئلے دے حل تے نگران وزیراعظم اتے حکومتی ٹیم دا شکریہ ادا کیتے۔ وفد وزیراعظم کوں 1500 میگاواٹ دے نویں سرمایہ کاری دے منصوبیں دا ݙسایا ، انہاں منصوبیں اچ مقامی ذرائع اتے قابل تجدید توانائی تے انحصار کیتا ویسی۔
