پاکستان اتے ایران دا سلامتی،علاقائی استحکام،  تجارت اتے معیشت دے شعبیں اچ تعاون ودھاوݨ تے اتفاق

اسلام آباد۔29جنوری(اے پی پی) پاکستان اتے ایران مشترکہ چیلنجز نال نبݨݨ سانڳے اجتماعی نقطہ نظر اپنیدے ہوئیں سلامتی، علاقائی استحکام، تجارت اتے معیشت دے شعبیں اچ مشترکہ مقصد سانڳے تعاون کوں مزید ودھاوݨ تے اتفاق کیتے۔ نگران وزیر خارجہ جلیل عباس جیلانی ایرانی ہم منصب حسین امیر عبداللہیان دے رلے سنوار کوں مشترکہ پریس کانفرنس توں خطاب کریندے ہوئیں آکھیے جو پاکستان اتے ایران ݙوہیں ملکاں وچال پہلے توں موجود مضبوط ادارہ جاتی میکانزم کوں مکمل طور تے بروئے گھندے آندے ہوئیں دہشت گردی نال نبݨݨ سانڳے اجتماعی اتے سانجھے تعاون تے مبنی نقطہ نظر اپناوݨ تے اتفاق کیتے۔ انہاں آکھیے جو ݙوہیں فریقاں منیے جو نیڑے ݙو پاسے تعلقات نہ صرف ݙوہیں ملکاں دے عوام دی مشترکہ خوشحالی اتے ترقی سانڳے ناگزیر ہن بلکہ خطے دے استحکام دا ھک اہم ذریعہ وی ہن۔ انہاں آکھیے ملاقات دے دوران فریقین ݙوہیں ملکاں دے وزراء خارجہ دی سطح تےاعلیٰ سطحی مشاورتی میکنزم بݨاوݨ تے اتفاق کیتے، اے اعلیٰ سطحی میکانزم ایران تے پاکستان ݙوہیں ملکاں اچ سانجھے تعاون دے مختلف شعبیں اچ تھیوݨ آلی پیش رفت دا مستقل بنیاداں تے جائزہ گھنسی ۔ وزیر خارجہ دہشت گردی دے حوالے نال ھک ݙوجھے دے تحفظات کوں دور کرݨ دی لوڑھ تے زور ݙیندے ہوئیں آکھیے ایں سلسلے اچ ݙوہیں فریقین رابطہ افسران  تعینات کرݨ تے اتفاق کیتے، اے رابطہ افسران تربت اتے زاہدان اچ تعینات کیتے ویسن ۔ وزیر خارجہ جلیل عباس جیلانی آکھیے ایرانی وزیر خارجہ دا دورہ پاکستان ݙوطرفہ تعلقات کوں مزید تکڑا بݨاوݨ سانڳے ساݙے عزم دا ثبوت اے۔ ملاقات اچ انہاں آکھیے علاقائی سالمیت دا احترام فوطرفہ تعاون دا بنیادی اصول اے۔ انہاں آکھیے ملاقات دے دوران ݙوہیں ملکاں دے سرحدی علاقیں دی اقتصادی ترقی کوں ترجیح ݙیوݨ تے وی اتفاق کیتا ڳئے اساں پنج باقی ماندہ سرحدی مارکیٹاں کوں تکھے فعال بݨاوݨ تے وی اتفاق کیتے اتے اے سرحدی مارکیٹاں وختی کم شروع کرݙیسن ۔ ایران دے وزیر خارجہ حسین امیر عبداللہیان آکھیے ایران اتے پاکستان وچال عظیم جغرافیائی، تاریخی اتے ثقافتی قدراں موجود ہن ، جے اساں پاکستان تے ایران دی تاریخ تے نظر پاؤں توں ݙوہیں ملکاں وچال کݙاہیں وی علاقائی اختلافات یا سرحدی مسئلیں دا کوئی واقعہ پیش نی آیا جیڑھا دوستانہ ݙوطرفہ تعلقات دا واضح ثبوت اے۔ انہاں آکھیے ایران پاکستان کوں آپݨا بھرا ، ہمسایہ اتے دوست ملک سمجھدے ،ݙوہیں ملک ھک ݙوجھے دی  علاقائی سالمیت دا مکمل احترام کریندن ۔ ایرانی وزیر خارجہ آکھیے ایں ڳالھ تے اتفاق کیتا ڳئے جو ݙوہیں ملک دہشت گردی کوں سرحدی علاقیں دی سلامتی کوں خطرے اچ پاوݨ دی اجازت نہ ݙیسن ۔ اساں سارے دہشت گرداں کوں واشگاف الفاظ اچ ݙسیسوں جو اساں (ایران اتے پاکستان) انہاں کوں آپݨی مشترکہ سلامتی کوں خطرے اچ پاوݨ دا کوئی موقع نہ ݙیسوں ۔