سانحہ 9 مئی سوچی سمجھی سازش اتے منصوبہ بندی نال کیتا ڳئے، وزیر دفاع خواجہ محمد آصف دی پریس کانفرنس

سیالکوٹ۔4مئی(اے پی پی):وزیر دفاع خواجہ محمد آصف آکھیے جو پچھلے سال 9 مئی کوں تھیوݨ آلا سانحہ سوچی سمجھی سازش اتے منصوبہ بندی نال کیتا ڳئے، ہک سیاسی جماعت ڄاݨ ٻڄھ تے حساس تنصیبات اتے ملکی اساس تے حملہ کیتے جیندے ثبوت موجود ہین جو ٹارگٹ پہلے توں طے ہن اتے پاکستان دی رید لائن پار کیتی ڳئی اے۔ اے ڳالھ وزیر دفاع خواجہ محمد آصف سیالکوٹ اچ پریس کانفرنس کریندے آکھی۔ انہاں آکھیا جو سیاسی و نظریاتی اختلافات اپݨی ڄاہ تے ٻھل کہین کوں وی اے اجازت نئیں ݙتی ونڄ سڳدی جو او پاکستان کوں نقصان پچاوے، واقعہ توں بعد سیاسی جماعت دے رہنما لک ڳن اتے اپݨے کارکناں کوں اوکھے ویلھے کلہا سٹ ݙتے، کڄھ لوکاں کوں سزا مل چکی اے اتے کڄھ دے مقدمے چلدے پن جیندا فیصلہ عدالتاں کریسن۔ انہاں آکھیا جو سیاسی جماعت دے لیڈر غلامی نامنظور دے نعرے لائن ٻھل ہݨ اے منتاں ترلے تے آڳن، ہݨ اے کمیٹیاں ٻݨا تے مذاکرات کرݨ چاہندن، مولانا فڄل الرحمان اتے محمود خان اچکزئی کوں مندے کݙھݨ آلے ہݨ مطلب کیتے اڳو پچھو ٻھڄدے ودن، اپݨے دور اچ اے اپوزیشن نال ملݨ تئیں پسند نا کریندے ہن، عمران خان کݙاھیں وی اپوزیشن نال ٻاھوݨ تک نا چاہندے ہن۔ خواجہ آصف آکھیا جو اساں صرف ڳالھ مہاڑ نال ہی معاملے حل کرݨ چاہندے ہیں، ٻھل انہاں ڄیکر سلیکٹیو مذاکرات کرݨے ہین تاں ایندی ناکامی لکھ ݙتی ڳئی اے، مذاکرات ہوون تاں اوندے اچ قومی ڈائیلاگ ہووے، ایندے اچ سارے فریقین اسٹیبلشمنٹ، عدلیہ اتے ساریاں سیاسی جماعتاں مل تے مسلیاں دا حل ڳولن۔ وزیر دفاع آکھیا جو ایں سال 9 مئی بارے قومی اسمبلی دا اجلاس سݙیا ویسی اتے انہان واقعات کوں یاد کیتا ویسی جو اڳو تے ایویں نا تھیوے۔