عازمین حج پاکستان دے سفیر بݨ تے ونڄن تے اتھاں ڈسپلن دا خیال رکھن ، چیئرمین سینیٹ سید یوسف رضا گیلانی

اسلام آباد۔10مئی  (اے پی پی):چیئرمین سینیٹ سید یوسف رضا گیلانی آکھیے عازمین حج پاکستان دے سفیر بݨ تے ونڄن تے اتھاں ڈسپلن دا خیال رکھن توں جو ملک دا ناں روشن تھیوے۔ جنوبی پنجاب توں 13 ہزار لوک حج دی سعادت سانڳے روانہ تھیسن ۔ مہانگ دے در اچ گزریل سال دی نسبت اڄوکے سال خرچہ گھٹ ہوسی ۔سینیٹ سیکرٹریٹ توں جاری بیان موجب اے ڳالھ انہاں ملتان ایئرپورٹ تے عازمین حج توں خطاب اچ آکھی اے ۔  چیئرمین سینیٹ سید یوسف رضا گیلانی آکھیے جنوبی پنجاب توں 13 ہزار لوگ حج دی سعادت سانڳے روانہ تھیسن ۔ انہاں آکھیے میکوں اڄ ٻہوں خوشی تھیندی پئی اے جو عازمین حج کوں رخصت کرݨ آیاں ۔سید یوسف رضا گیلانی دا مزید آکھݨ ہئی جو ملتان ایئرپورٹ توں ایئر سیال دی اڄ پہلی پرواز روانہ تھیندی پئی اے تے ملتان توں مدینہ دا سفر چار گھنٹے دا تھی ڳئے۔ ملتان ائیر پورٹ  پاروں عازمین حج دا سفر سوکھا تھی ڳئے ۔ انہاں آکھیے آئے ݙینھ ساݙے لوک دہشت گردی دا نشانہ بݨدے پئن تے شہید تھیندے پئن ۔چیئرمین سینیٹ سید یوسف رضا گیلانی عازمین حج کوں آکھیے او شہدا سانڳے خصوصی طور تے دعاواں کرن ۔چیئرمین سینیٹ ایں موقع تے ائیر پورٹ سکیورٹی، ایف آئی اے اتے سکیورٹی دے سارے اداریں دا شکریہ وی ادا کیتے ۔