حکومت دی کاروبار دوست پالیسیاں دے مثبت نتیجے آوݨ شروع تھی ڳئن ، وزیراعظم   شہبازشریف

اسلام آباد۔17مئی(اے پی پی):وزیرِ اعظم محمد شہباز شریف آکھیے حکومت دی کاروبار دوست پالیسیاں دے مثبت نتیجے آوݨ شروع تھی ڳئن ، ٻاہرلے سرمایہ کاراں اتے کاروباری برادری کوں ملک اچ روزگار دی فراہمی، ملکی برآمدات اچ ودھارے تے معاشی ترقی اچ آپݨا کردار نبھاوݨ سانڳے حکومت ہرقسم دا تعاون کریندی پئی اے ۔ وزیراعظم آفس دے میڈیاونگ توں جاری بیان موجب اے ڳالھ انہاں مشروبات بݨاوݨ آلی بین الاقوامی کمپنیاں دے وفد کوں آکھی اے جنہاں اتھاں وزیراعظم نال ملاقات کیتی ۔ ملاقات اچ کوکاکولا پاکستان و افغانستان دے نائب صدر وولکان اونگُچ ،سی ای او پیپسی کو پاکستان و افغانستان  محمد کھوسہ دی قیادت اچ وفد ملاقات کیتی جݙاں جو ایں موقع تے وفاقی وزرا جام کمال خان، رانا تنویر حسین، عبدالعلیم خان اتےمتعلقہ اعلی حکام وی موجود ہن ۔ وفد دے ارکان وزیرِ اعظم دی قیادت اچ حکومت دی کاروبار دوست پالیسیاں تے انہاں کوں خراجِ تحسین پیش کیتے۔ وفد ݙسائے جو بین الاقوامی مشروبات بݨاوݨ آلیاں کمپنیاں دے پاکستان اچ 25 دے نیڑے کارخانے ہن جنہاں اچ 1 لکھ 30 ہزار لوکاں کوں براہ راست روزگار ݙتا ویندے ۔ وفد وزیرِ اعظم کوں کمپنیاں دی طرفوں ملک اچ ری سائیکلنگ دے ساریں توں وݙے نظام دے دے حوالے نال ݙسائے جو اے کمپنیاں ملکی خزانے کوں ٹیکس دی مد اچ ہرسال ٻہوں وݙا حصہ ݙیندن ۔ ایں موقع تے وزیراعظم آکھیے ٻاہرلے سرمایہ کاروں تے کاروباری برادری کوں ملک اچ روزگار ݙیوݨ ، ملکی برآمدات اچ ودھارے تے معاشی ترقی اچ آپݨا بھرپور کردار نبھاوݨ سانڳے حکومت ہرقسم دی معاونت کریندی پئی اے۔