پاکستان شنگھائی تعاون تنظیم دے چارٹر دے نال ’’شنگھائی سپرٹ‘‘تے پکا کاربند اے، رکن ملکاں نال سانجھے تعلقات ودھاوݨ ترجیح اے ،نائب وزیراعظم اسحاق ڈار دا ایس سی او دی وزراءخارجہ کونسل دے اجلاس توں خطاب

آستانہ۔21مئی(اے پی پی):نائب وزیراعظم محمد اسحاق ڈار آپݨے ملک پاکستان دی طرفوں شنگھائی تعاون تنظیم دے چارٹر دے نال’’شنگھائی سپرٹ‘‘ تے پکا رہݨ دا اعادہ کریندے ہوئیں آکھیے جو پاکستان تنظیم دے رکن ملکاں نال سانجھے تعلقات ودھاوݨ کوں ترجیح ݙیندے ، ایس سی او فورم تے پیش آندے چیلنجز دا حل ڳولیان ونڄ سڳدے ،اجتماعی تعاون تے نقطہ نظر دے ذریعے دہشت گردی دے خطرے دا مقابلہ کرݨ دی لوڑھ اے ۔ اے ڳالھ انہاں آستانہ، قزاخستان اچ شنگھائی تعاون تنظیم دی وزراء خارجہ کونسل دے اجلاس توں خطاب اچ آکھی اے ۔ نائب وزیراعظم پاکستان دی طرفوں ایس سی او دے چارٹر دے نال ’’شنگھائی سپرٹ‘‘ تے پکی پاسداری دا اعادہ کیتے جیڑھا جو مشترکہ خوشحالی اتے ترقی سانڳے سانجھے اعتماد اتے احترام تے مبنی اے۔ انہاں ایس سی او کونسل آف ہیڈز آف گورنمنٹ (سی ایچ جی) دے موجودہ سربراہ دے طور تے پاکستان دی ترجیحات دی وضاحت کیتی تے بین الاقوامی قانون اتے اقوام متحدہ دے چارٹر دی پاسداری تے زور ݙتا ۔ نائب وزیراعظم اسحاق ڈار اقوام متحدہ دی سلامتی کونسل دی متعلقہ قرارداداں موجب لوکاں دے حق خود ارادیت اتے پراݨے جھیڑے دے پرامن حل تے زور ایں موقع تے نائب وزیر اعظم اسحاق ڈار ایران دے صدر ابراہیم رئیسی ، وزیر خارجہ اتے انہاں دے رفقا دی ہیلی کاپٹر حادثے اچ شہادت تے دلی تعزیت کیتی۔