مار خور ساݙے قدرتی ورثے دی علامت اے،وزیراعظم شہباز شریف دا مارخور دے پہلے جڳ ݙیھاڑ تے پیغام

اسلام آباد۔24مئی (اے پی پی):وزیر اعظم محمد شہباز شریف آکھیے اڄ اساکوں فخر نال پاکستان دے قومی جانور مارخور دا پہلا جڳ ݙیھاڑ منیندے پیوں ،مار خور کوں ھک عظیم الشان جانور منیا ویندے جیڑھا ساݙے قدرتی ورثے دی علامت اے۔ پاکستان دے قومی جانور مارخور دے جڳ ݙیھاڑ تے آپݨے خصوصی پیغام اچ انہاں آکھیے مارخور اپݨے منفرد کارک سکرو دی شکل دے سنگھاں نال ، حیاتیاتی تنوع دے تحفظ اتے ماحولیاتی توازن کوں برقرار رکھݨ سانڳے ساݙے عزم دی نمائندگی کریندے ۔شہباز شریف آکھیے 2 مئی 2024 کوں اقوام متحدہ دی جنرل اسمبلی دے اعلان موجب اے ݙینھ مناوݨ دا فیصلہ کیتا ڳئے ۔ ایں ݙینھ کوں عالمی سطح تے مناوݨ دا فیصلہ جنگلی حیات دے تحفظ اچ ساݙی قوم دیاں کوششاں تے کامیابیاں دا اعتراف اے۔وزیر اعظم آکھیے گزریل ھک ݙھاکے توں مارخور دی آبادی اچ ودھارا قدرتی ماحول دے تحفظ سانڳے پاکستان دی لڳن دا منہ ٻولیندا ثبوت اے ، مارخور دے تحفظ دے پروگراماں اچ مقامی کمیونٹی دے تعاون تے سائنسی تحقیق دا کلیدی کردار اے۔شہباز شریف آکھیے پاکستان جنگلی حیوانات اتے نباتات دے خطرے توں ݙوچار انواع اچ بین الاقوامی تجارت دے کنونشن دے پرعزم دستخط کنندہ دے طور تے بین الاقوامی تجارت دے کنونشن کیٹگری- I اچ نمایاں درجہ رکھیندے ایں حوالے نال کیتی ڳئی خصوصی قانون سازی، پاکستان ٹریڈ کنٹرول آف وائلڈ فاؤنا اینڈ فلورا ایکٹ، 2012، ذمہ دارانہ تجارتی طریقیں تے خطرے توں ݙو چار انواع دی فلاح و بہبود سانڳے ساݙی جڑت کوں واضح کریندی اے ۔وزیراعظم آکھیے مارخور دے جڳ ݙیھاڑ تے میں سارے پاکستانیاں تے عالمی برادری توں مطالبہ کرینداں جو او ماحولیاتی تحفظ سانڳے آپݨے عزم دا اعادہ کرن۔