حکومت ملکی برآمدات ودھاوݨ سانڳے ترجیحی بنیاداں تے اقدامات کریندی پئی اے ، وزیراعظم شہباز شریف

اسلام آباد۔31مئی (اے پی پی):وزیرِ اعظم محمد شہباز شریف آکھیے حکومت ملکی برآمدات ودھاوݨ سانڳے ترجیحی بنیاداں تے اقدامات کریندی پئی اے ،آٹو سیکٹر پاکستان اچ مقامی سطح تے گاݙیاں تیار کرے۔ وزیراعظم آفس دے میڈیاونگ توں جاری بیان موجب اے ڳالھ انہاں آٹو اتے آٹو پارٹس مینوفیکچررز دے وفد کوں آکھی جنہاں وزیراعظم نال ملاقات کیتی ۔ وفد اچ چیف ایگزیکٹو آفیسر ٹویوٹا پاکستان علی جمالی، آٹو پارٹس صنعت دے نمائندے عامر اللہ والا شامل ہن۔ ملاقات اچ وفاقی وزیرِ صنعت رانا تنویر حسین وفاقی وزیرِ تجارت جام کمال خان، وزیرِ اعظم دے کوارڈینیٹر رانا احسان افضل، چئیرمین ایف بی آر اتے متعلقہ اعلی حکام شریک ہن ۔ ایں موقع تے وفد حکومت دی کاروبار و سرمایہ کار دوست پالیسیاں تے وزیرِ اعظم کوں خراج تحسین پیش کیتے اتے آٹو سیکٹر دے مسئلے ݙسائے۔ وزیراعظم آکھیے آٹو سیکٹر پاکستان اچ مقامی سطح تے گاݙیاں دی تیاری کرے ۔ آٹو سیکٹر اپݨی مصنوعات دا ھک خاطر خواہ حصہ برآمد کرے اتے ملکی ترقی اچ آپݨا کردار نبھاوے ۔ آٹو سیکٹر ڈیلیشن دی پالیسی تے عملدرآمد کرے ۔ وزیرِ اعظم آکھیے پاکستان دی آٹو پارٹس دی صنعت عالمی ویلیو چین دا حصہ بݨے ۔ حکومت ملکی برآمدات ودھاوݨ سانڳے ترجیحی بنیاداں تے اقدامات کریندی پئی اے۔