دانش سکول دا دائرہ ودھایا ویسی، اوکھے حالات اچ چنڳی کارکردگی ݙکھاوݨ آلے نینگر تعریف دے قابل ہن، وزیراعظم شہبازشریف

اسلام آباد۔11جولائی  (اے پی پی) وزیراعظم محمد شہبازشریف  آکھیا جو دانش سکول دا دائرہ ودھایا ویسی، اوکھے حالات اچ چنڳی کارکردگی ݙکھاوݨ آلے نینگر تعریف دے قابل ہن۔ اے ڳالھیں انہاں دانش سکول دے طالب علم محمد آیان کاشف نال ڳالھ مہاڑ کریندیں ہوئیں آکھی جنہاں خمیس کوں انہاں نال ملاقات کیتی۔ ایں موقع تے وفاقی وزیر اطلاعات تے نشریات  عطا اللہ تارڑ، وزیراعظم یوتھ پروگرام دے چیئرمین رانامشہود احمد خان ،  متعلقہ حکام  اتے آیان کاشف دی اماں اتے ݙاݙی موجود ہن۔ وزیراعظم آیان کاشف اتے انہاں دے ٹبر کوں انٹرمیڈیٹ و سیکنڈری ایجوکیشن بورڈ لاہور اچ پہلی پوزیشن ڳھنݨ تے مبارخ ݙتی۔ وزیراعظم آکھیا جو کل جئیں ویلھے میکوں پتہ لڳیا جو دانش سکول دے طالب علم پوزیشن ڳھدی اے تاں انہاں کوں ٻہوں خوشی تھئی۔ آیان کاشف پئیو دے پچھانوے توں محروم تھی ڳئے ہن اتے انہاں دی ݙاݙی اتے اماں انہاں کوں پالیا۔ وزیراعظم آکھیا جو او نینگر ٻال جیڑھے اوکھے حالات اچ تعلیم جاری رکھیندن او خصوصی طور مبارخ باد دے مستحق ہن۔ آیان کاشف  وزیراعظم داشکریہ ادا کریندیں ہوئیں آکھیا جو   دانش سکول  شہبازشریف دا  وژن ہئی اتے اڄ میݙی کامیابی دا سہرا دانش سکول دے سر اے۔ وزیراعظم آکھیا جو دانش سکولز کوں پاکستان دے ݙوجھے علاقیاں اچ وی ٻݨایا ویسی۔ بلوچستان اچ  4 دانش سکول کھولیے ویندے پئن۔ گلگت بلتستان ، آزاد کشمیر ، اسلام آباد ، دیہاتی علاقیاں اچ دانش سکولز کھولیے ویندے پئن۔  آیان کاشف وزیراعظم دے استفسار تے ݙسیا جو دانش سکول اچ انہاں کوں رہائش، یونیفارم، کھاوݨ پیوݨ سودھے ساری سہولتاں ہن۔ وزیراعظم آکھیا جو او اللہ تعالیٰ دا شکر ادا کریندیں جئیں انہاں کوں اے سکول ٻݨاوݨ دی توفیق ݙتی۔ میکوں اے چیز ٻہوں تکلیف ݙیندی ہئی جو ایچی سن کالج سویں تعلیمی اداریاں دے دروازے غریب ٻالاں تے نی کھل سڳدے اتے انہاں تعلمی اداریاں اچ متمول، زمیندار اتے وݙے ٹبراں دے ٻال ای پڑھ سڳدن۔ غریب دا ٻال ایجھے کالج اچ داخلے دا سوچ ای نی سڳدا۔ وزیراعظم  آیان کاشف کوں میڈل پویندیں ہوئیں آکھیا جو پاکستان دی ترقی دی کنجی ہونہار طلبا تے طالبات دے ہتھ اچ اے۔ وزیراعظم آکھیا جو صنعت تے حرفت اتے زراعت دی ترقی اتے پیداوار ودھاوݨ کیتے باصلاحیت نینگراں دی کھیپ تیار کرݨ اساݙی ذمہ واری اے۔ آیان کاشف وزیراعظم نال خواہش کیتی جو دانش سکولاں کوں یونیورسٹی تئیں ترقی ݙتی ویسی۔ وزیراعظم آکھیا جو ایں بارے وزیراعلیٰ پنجاب مریم نواز نال ڳالھ کریسن۔ اے چنڳی تجویز اے۔ وزیراعظم آکھیا جو اسلام آباد اچ دانش سکول کیتے زمین اتے فنڈز رکھین۔ بلوچستان  ، سابق فاٹا،آزاد کشمیر اتے گلگت بلتستان اچ وی ٻہوں جلدی دانش سکول ٻݨیسن تانجو ایجھے ٻال جئیں کنے وسائل کائینی انہاں کوں تعلیمی سہولتاں مل سڳن۔ آیان کاشف دی اماں آکھیا جو او آپݨے ٻال دی کامیابی توں بہوں خوش ہن۔ میݙے پتر کوں دانش سکول پاروں تعلیم دا موقع ملیا۔  دانش سکولاں دے سکولاں دی جتنی تعریف کیتی ونڄے ڳھٹ اے۔ وزیراعظم آکھیا جو میں دانش سکولاں کیتے بہترین استادیں دی خدمات ڳھنݨ دی ہدایت کیتی ہئی۔ ودھ تنخواہیں تے استادیں دی خدمات ڳھنݨ تے احتجاج وی تھیا پر میں آکھیا جو غریب ٻالاں کوں وی ایچی سن کالج ، لارنس کالج، گرائمر، کانونٹ اتے بھاری  فیساں آلے پرائیویٹ سکولاں سویں تعلیم دی سہولتاں آلے سکول اچ پڑھݨ دا حق اے۔ وزیراعظم آکھیا جو میکوں خوشی اے جو وزیراعلیٰ پنجاب  مریم نوازمیݙے وژن کوں اڳوں ودھیندی پئن۔  وزیراعظم آیان کاشف دی حوصلہ افزائی کیتے انہاں کوں 10 لکھ روپے داچیک اتے لیپ ٹاپ ݙتا اتے تلقین کیتی جو ایں محنت، جذبے اتے لگن نال اڳوں ودھن اتے قوم دے معمار ٻݨن۔