ساوݨ اچ پنجاب دے ٻہوں سارے ضلعیں اچ زور دا مینھ وسݨ دا امکان

لاہور۔19جولائی(اے پی پی) ساوݨ اچ پنجاب دے ٻہوں ضلعیں اچ  زور دا مینھ وسݨ دا امکان اے ۔ترجمان پی ڈی ایم اے موجب صوبے اچ اندھاری گھلݨ تے کھمݨ نال مینھ وٹھسے ،ساوݨ دے مینھ دا سلسلہ 20 جولائی تئیں جاری رہݨ دی پیشگوئی اے،لاہور، سیالکوٹ، نارووال، گوجرانولہ، فیصل آباد تے راولپنڈی اچ ساوݨ دا مینھ وسݨ دا امکان اے ،پنجاب دے دریاواں دریائے سندھ، چناب ،راوی، جہلم اتے ستلج اچ پاݨی نارمل لیول تے وہندا پئے ،منڳلا ڈیم 55 فیصد تے تربیلا ڈیم اچ پاݨی دی سطح 72 فیصد تئیں اے ،پاکستانی دریاواں تے ٻݨیے بھارتی ڈیمزاچ پاݨی دی سطح 38 فیصد تئیں اے،ڈی جی پی ڈی ایم اے عرفان علی کاٹھیا متعلقہ اداریں کوں الرٹ رہݨ دی ہدایت جاری کیتی اے۔ وݙے شہراں دی انتظامیہ پیشگی انتظامات کرے،شہری دریاواں ندی نالیں دی غیر ضروری کراسنگ نہ کرن ،بجلی دیاں تاراں تے کھمبیں توں فاصلہ رکھن ، پی ڈی ایم اے کنٹرول روم 24 گھنٹے صورتحال کوں مانیٹر کریندا پئے ،ہنگامی صورتحال اچ پی ڈی ایم اے دی ہیلپ لائن 1129تے رابطہ کیتا ونڄے