وزیراعلی پنجاب دوران ڈکیتی چھوہر نال زیادتی دا نوٹس گھن ڳھدا

لاہور۔20جولائی(اے پی پی) وزیراعلی پنجاب مریم  نواز کامونکی دے نیڑے جی ٹی روڈ تے ڈکیتی ویلھے نکی چھوہر نال زیادتی دے واقعہ دا  نوٹس گھن ڳھدے ۔ ترجمان موجب چار ݙینھ پہلے جی ٹی روڈ تے ڈکیتی ویلھے 14 سالہ چھوہر نال زیادتی دے معاملے اچ وزیراعلی مریم نواز دی ہدایت تے چیئرپرسن پنجاب وومن پروٹیکشن اتھارٹی حنا پرویز بٹ متاثرہ چھوہر دے گھر ڳئن ۔ انہاں متاثرہ چھوہر تے گھر آلیں نال ملاقات کیتی تے انصاف دا یقین ݙیوائے ایں موقع تے میݙیا نال ڳالھ کریندے انہاں آکھیے اساکوں ݙکھ تھیندے جݙاں کہیں تریمت کوں زیادتی دا نشانہ بݨایا ویندے ساݙے معاشرے اچ تریمت دے معاملات اچ رواداری صفر اے۔ انہاں آکھیے وزیراعلی دا آکھݨ اے تریمت ساݙی ریڈ لائن اے لہذا  ملزماں کوں 24 گھنٹے اچ گرفتار کر ڳھدا ویسی  تے انہاں کوں عبرت دا نشان بݨیسوں ۔ وزیراعلی  دا ویژن پنجاب دی ساریاں ٻالڑیاں کوں تحفظ ݙیوݨ اے ،جے ایجھے ملزماں کوں سخت سزا نہ ݙتی ڳئی تاں ساݙیاں ٻالڑیاں جنسی تشدد توں محفوظ نہ رہسن ۔ واضح رہے متاثرہ14 سالہ چھوہر کجھ ݙینھ پہلے آپݨے رشتہ دار دے رلے موٹرسائیکل تے جی ٹی روڈ تے سفر کریندیاں پیاں ہن جنہاں کوں چیانوالی دے نیڑے موٹر سائیکل سوار ݙو ڈاکوواں روکیا تے نقدی چار ہزار روپے کھس ڳھدے جݙاں جو ھک ڈاکو چھوہر کوں جنسی زیادتی دا نشانہ وی بݨایا ۔پولیس متاثرہ چھوہر دے بھرادی درخواست تے ایف آئی آر درج کرتے تفتیش شروع کرݙتی اے