تحریک انصاف ہمیشہ انتشار تے تشدد دی سیاست کیتی، پی ٹی آئی ہمیشہ لاشاں دے انتظار اچ رہندی اے ، تحریک انصاف تے پاکستان کٹھے نی چل سڳدے آپݨے ملک تے پرچم دا تحفظ کرݨ ڄاݨدوں ، عطاءاللہ تارڑ

اسلام آباد۔21جولائی (اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے تحریک انصاف ہمیشہ انتشار تے تشدد دی سیاست کیتی، پی ٹی آئی ہمیشہ لاشاں دے انتظار اچ رہندی اے ، تحریک انصاف تے پاکستان کٹھے نی چل سڳدے آپݨے ملک تے پرچم دا تحفظ کرݨ ڄاݨدوں ، تحریک انصاف تے پابندی دے حوالے نال مشاورت جاری اے، بانی پی ٹی آئی کوں جیل اچ ساریاں سہولتاں ملدیاں پئن ، بنوں واقعہ تحریک انصاف خود کروائے، خیبر پختونخوا حکومت دے تحقیقاتی کمیشن کوں مسترد کریندوں ، جرمنی واقعہ قابل مذمت اے، جرمنی اچ پاکستانی سفارتخانے تے حملے اچ جے کئی پاکستانی ملوث تھیا تاں ایندا پاسپورٹ تے شناختی کارڈ بلاک کیتا ویسی ۔ پی ٹی وی ہیڈ کوارٹرز اچ پریس کانفرنس توں خطاب کریندے وفاقی وزیر اطلاعات آکھیے کجھ اہم حقائق عوام دے سامݨے رکھݨ ضروری ہن تان جو کوڑے بیانے تے پروپیگنڈے توں پردہ چاتا ونڄ سڳے۔ انہاں آکھیے ھک جماعت دی ہمیشہ توں کوشش رہی اے جو ملک اچ انتشار تے تشدد دی سیاست کیتی ونڄے تے ملک اچ حالات خراب تھیون ، معاشی استحکام نہ آوے۔ جݙاں اے اقتدار وچ ہن او ویلھے وی ایہو طرز سیاست تے ہݨ اپوزیشن اچ وی ایہا پالیسی اے جو ملک اچ دہشت اتے انتشار کیویں کھنڈایا ونڄے، معیشت کوں کیویں ضیان پڄایا ونڄے ملک کوں ڈی رییل کیویں کیتا ونجے ، ایہو انہاں دا منشور تے مقصد اے۔ انہاں آکھیے 2014ءاچ انہاں آپݨے دھرنے اچ پی ٹی وی تے حملہ کیتا اوں ویلھے دے صدر انہاں کوں حملے دی مبارخ ݙتی ۔ انہاں ہمیشہ ڳالھیں مندے دی سیاست کیتی تے آپݨے مخالفین دے خلاف غلط زبان استعمال کیتی، ہمیشہ لاشاں دی سیاست انھاں دا خاصا رہیے ۔وفاقی وزیر آکھی ے9 مئی دے واقعہ اچ کور کمانڈر ہاؤس اتے جی ایچ کیو تے حملہ کیتا ڳیا ۔ انھاں دا بیانیہ فوج نال لوکاں کوں بھڑاوݨ ہئی جݙاں جو سسٹم ڈی ریل تھی سڳے، ایجھی طرز سیاست رکھݨ آلی جماعت سیاسی نی دہشت گردی جماعت تھی سڳدی اے ۔ وزیر اطلاعات آکھیے دہشت گرداں کوں ملک اچ گھن آتے وساوݨ دے حوالے نال بانی چئیرمین دا بیان موجود اے، انھاں دی ہمیشہ طالبان سانڳے ہمدردی ہئی اے اڄ وی لاشاں دی ڳول وچ ہن ۔ 15 جولائی کوں ساݙے 8 نینگراں بنوں اچ جام شہادت نوش کیتا، لکی مروت دے ھک جوان گرینیڈ  تے سم تے آپݨی جان دا نذرانہ ݙتے تے سینکڑاں لوکاں دیاں جاناں بچائن ایندے ترائے ٻال ہن ۔ وفاقی وزیر اطلاعات آکھیے انہاں بنوں اچ فوج دی طرفوں سویلین تے فائرنگ دا الزام لاتے، بنوں اچ تاجراں دا امن مارچ ہئی جیں اچ سیاسی جماعتاں دے لوک شامل ہن تے جتھاں دہشت گردی دا واقعہ تھئے اتھاں ونڄ تے فائرنگ کرݙتی، اتھاں ھک بندہ جاں بحق اتے بھاڄڑ مچݨ توں 22 لوک زخمی تھئن امن مارچ اچ مسلح جتھے رلیے انہاں فائرنگ کیتی تے بھاڄڑ مچی ۔ 15 جولائی کوں جتھاں دہشت گردی دا واقعہ تھئے اتھاں 8 جوان شہید تھئن اتھاں ونڄ تے فائرنگ کرݨ تے امن مارچ اچ مسلح تھی تے آوݨ دا کیا جواز اے۔ ھک کلومیٹر اندر فائرنگ کرتے ھک بندے کوں ماریا ڳئے۔ تاجراں امن واستحکام سانڳے امن مارچ کیتا۔ انہاں آکھیے ایجھی سیاست نہ کرو ، 9 مئی دے واقعات اچ جیڑھے لوک استعمال تھئن انہاں دا کوئی ولی وارث نی بݨیا انہاں آپݨے خاندان تے لیڈراں کوں محفوظ کرڳھدا ۔ انہاں آکھیے انہاں دے کیس دی پیروی تئیں نی کیتی ۔ بنوں واقعہ دی انکوائری توں انکار کیتا ڳئے ظہر اے جنھاں دے لوک ایں وچ ملوث ہن انہاں دی انکوائری کیوں کرویسن ۔ عالمی جریدے اچ ھک آرٹیکل آئے جو خان صاحب کوں دہشت گرداں دے ڈیتھ سیل اچ رکھیا ڳئے جݙاں جو انہاں دے آپݨے دور اچ شہباز شریف صاحب کوں بکتر بند گاݙی اچ گھن آئے ہن ، مریم نواز شریف کوں ھک چھوٹے سیل اچ رکھیا ڳیا جتھاں جاہ نماز وچھواݨ دی مناسب جاہ موجود کائناں ہئی ۔ وفاقی وزیر آکھیے جیڑھا بندہ قید اچ ݙوجھیں دے گھر توں کھاݨا نی ݙیوݨ ݙیندا ، بکتر بند گاݙیاں اچ انہاں کوں گھن آتے ڈیتھ سیل اچ رکھیندا ، او اڄ وکیلاں دے ذریعے کوڑے انٹرویوزݙیندا پئے ، بانی پی ٹی آئی دے سیاسی رہنماواں، وکیلاں اتے فیملی نال ہفتے اچ ترائے ݙینھ ملاقات تھیندی اے ، انہاں کوں سائیکل تے واک دی سہولت میسر اے، کچن دا انتظام موجود اے، اساں سیاسی انتقام ڳھدے نہ گھنسوں اے ٻاہرلے ملک دنیا کوں بے وقوف بݨیندا پئے انہاں کوں ڈیتھ سیل اچ رکھیا ڳئے ۔ وفاقی وزیر اطلاعات آکھیے بانی پی ٹی آئی کوں جیل اچ پرتعیش سہولتاں ملدیاں پئن ، حکومت کݙاہیں جیل اچ انہاں کوں تکلیف ݙیوݨ دی ڳالھ نی کیتی جݙاں جو اے آپݨے دور اچ  دوائیں تک جیل نہ ونڄݨ ݙیندے ہن اعلان کریندے ہن انہاں کوں سہولتاں نہ ݙیساں انہاں دی اڄ وی کوشش اے انہاں کوں لاشاں ملن بنوں اچ فائرنگ انھاں دے لوکاں کیتی  مسلح جتھے خود بھیڄے۔ انہاں دے اکسائے لوکاں جرمنی اچ  ساݙے سفارت خانے تے حملہ کیتے، اساں جرمنی نال احتجاج کیتے، ایں واقعہ اچ ملوث لوکاں دی گرفتاری اتے سفاتخانے دی سیکورٹی یقینی بݨاوݨ دا مطالبہ کیتے ایندے اچ کہیں پاکستانی دی موجودگی دے حوالے نال چئیرمین نادرا کوں آکھیے او انہاں دی ویڈیو توں نشاندہی کرن، قومی پرچم دی توہین ناقابل برداشت اے۔ایں پرچم اچ ساݙے شہداءدیاں لاشاں لپٹیاں نظر آندن ایں پرچم کوں اچا رکھݨ سانڳے قوم قربانیاں ݙتن ، پرچم اُچا رکھݨ سانڳے جان وی حاضر اے ۔ عطاءاللہ تارڑ آکھیے اے ھک مائنڈ سیٹ اے جنہاں ہمیشہ انتشار دی سیاست کیتی، 9 مئی دکا حملہ، اسمبلی دی تحلیل اتے سائفر دا کوڑا بیانیہ گھڑیا ڳئے۔ اکثر پاکستانیاں کوں تحریک انتشار دے پاسے اکسایا ویندے انہاں دے بہکاوے اچ آتے جے کوئی واقعہ اچ پاکستانی ملوث نکلیا ایندا شناختی اتے پاسپورٹ بلاک تھیسی تے سخت کاروائی کیتی ویسی ، جرمنی کارروائی دا یقین ݙیوائے ، ھک پاسے ترقی تے خوشحالی اے تے ݙوجھے پاسے ملک کوں ڈی ریل کیتا ویندا پئے