“عزم استحکام” فوجی آپریشن نئیں، ہک مربوط انسداد دہشت گردی مہم اے، 9 مئی دے ذمہ داراں کوں ݙھیل ݙیوݨ نال فساد کھنݙسی، ڈی جی آئی ایس پی آر

راولپنڈی۔22جولائی(اے پی پی)پاک فوج دے ترجمان لیفٹیننٹ جنرل احمد شریف چوہدری آکھیے جو “عزم استحکام” فوجی آپریشن نئیں، ہک مربوط اتے ہمہ گیر انسداد دہشت گردی مہم اے، 9 مئی دے ذمہ داراں کوں ݙھیل ݙیوݨ نال فساد کھنݙسی، ہک سیاسی مافیا انسداد دہشتگردی مہم دے خلاف اٹھی تے ایکوں متنازعہ ٻݨاوݨ چاہندے، ڄیکر ذمہ داراں کوں توڑ نا پچیسوں تاں ملک اچ ٻیا فساد کھنݙسی۔ راولپنڈی اچ پریس کانفرنس کریندے انہاں آکھیا جو پریس کانفرنس دا مقصد کجھ اہم معاملیاں تے افواج پاکستان دا موقف ݙساوݨ اے، اڄکل مسلح افواج دے خلاف کہیں وی شکل اچ منظم پراپیگنڈہ، کوڑ، غلط معلومات اتے گھڑیان گھڑیایاں خبراں ودھ ڳن جیندے تے الاوݨ ضروری اے۔ انہاں آکھیا جو 2024 اچ 22 ہزار 809 انسداد دہشتگردی آپریشن تھئین جیندے اچ 31 ٻہوں مطلوب دہشت گرداں  سودھا 398 دہشتگرد ماریے ڳن، دہشتگردی نال نٻݨݨ کیتے پاک فوج، پولیس، انٹیلی جنس ایجنسیز نال رل تے روزانہ 112 آپریشن کریندی پئی اے، ایں دوران پاک فوج دے 137 افسران اتے جوان شہید تھئین، پوری قوم انہاں بہادر جواناں کوں سلام کریندی اے ڄئیں مادروطن کیتے اپݨی جان واری اے۔ آپریشن عزم استحکام بارے آکھیا جو ایندے تے ٻہوں ابہام اے جو “عزم استحکام” کیا اے؟ ساݙا مسئلہ سنجیدہ معاملیاں کؤں وی سیاست وات کرݨ اے، ڄیکر “عزم استحکام” دا آکھوں تاں اے کوئی فوجی آپریشن نئیں ہک مربوط انسداد دہشتگردی مہم اے، “عزم استحکام” بارے وزیراعظم دی اڳواݨی اچ 22 جون کوں نیشنل ایپکس کمیٹی دا اجلاس تھیا ہا جیندے اچ متفقہ طور تے آپریشن شروع کرݨ دا کٹھا علامیہ جاری کیتا ڳیا جو انسداد دہشتگردی مہم کیتے کثیر الجہتی نیشنل ایکشن پلان دے تحت جامع حکمت عملی اپنائی ویسی۔ اجلاس توں بعد وزیر اعظم ہک ودھ متحرک انسداد دہشتگردی مہم دی وی منظوری ݙتی ہئی جو ایکوں “آپریشن عزم استحکام” دے ناں توں شروع کیتا ویسی ڄیڑھا بالکل اتفاق رائے نال تھیسی تے موثر قانون سازی کیتی ویسی کیوں جو اے پوری قوم دا فیصضہ اے جو دہشتگردی دے خلاف کارروائی پاکستان دی جنگ اے اتے ساݙی سالمیت کیتے ضروری اے، کہیں کوں وی ریاست دی رٹ کوں چیلنج کرݨ دی اجازت نا ݙتی ویسی، آپریشن بارے غلط بیانیہ ٻݨایا ڳئے جو لوکاں کوں بیدخل کیتا ویندا پئے، معاملے تے 2 ݙینھ بعد وزیر اعظم آفس اعلامیہ جاری کیتے جو عزم استحکام کوں غلط سمجھیا ویندا پئے، ایکوں راہ نجات، ضرب عضب آپریشنز نال ڄوڑݨ غلط اے، این ویلھے کتھائیں نو گو ایریاز کائنی تہوں کوئی وݙا ملٹری آپریشن نئیں تھیندا پیا، عزم استحکام ملٹی  ڈومین، ملٹی ایجنسی، ہول آف دی سسٹم  نیشنل وژن اے، پاکستان اچ استحکام کیتے اے نیشنل ایکشن پلان کوں ولا متحرک کریسی ایندے علاوہ کڄھ نئیں۔ انہاں آکھیا جو نان کسٹم پیڈ گاݙیان لکھاں دی تعداد اچ پاکستان اچ موجود ہین اتے ایں غیرقانونی اسپیکٹرم دا حصہ ہین، ایندے اچ ارباں روپے دا کاروبار تھیندا پئے جیندے نال ایہے دہشتگرد وی کارروائیان کریندن، ڄݙاں اے صورتحال ہووے جو بے نامی جائیداداں، بے نامی اکاؤنٹس، تمباکو تے منشیات دی سمگلنگ ڄھیں غیر قانونی کم ہوون تاں کیا تھیوݨے؟ جیکوں روکݨ کیتے نظرثانی شدہ نیشنل ایکشن پلان دی لوڑھ اے۔ ڈی جی آئی ایس پی آر آکھیا جو انسداد دہشتگردی مہم دا مقصد دہشتگرداں اتے  مجرماں دا ڳٹھ جوڑ تروڑݨ اے، عزم استحکام اتے قومی ایکشن پلان ݙو تحریری دستاویزات ہین ول وی ایکوں متنازع ٻݨایا ویندا پئے، ہک تکڑی لابی ایندے خلاف کم کریندی پئی اے، ایں توں پہلے 2014 اچ اے پی ایس واقعے توں بعد نیشنل ایکشن پلان تے متفقہ عمل تھیا ہا تاں ہݨ کیوں ایندے خلاف وݙا سیاسی اتے غیر قانونی مافیا کیوں سامݨے آڳئے اتے ایکوں متنازع ٻݨاوݨ وی ہک چال اے۔ انہاں آکھیا جو نیکٹا ہر سال ریوائزڈ نیشنل ایکشن پلان دی اپ ڈیٹ ݙیندی اے جیندے مطابق خیبرپختونخوا اچ سی ٹی ڈی دی اسٹرینتھ 2437 اے، جیڑھے فیلڈ آپریٹرز ہین او 537 ہین، بلوچستان اچ سی ٹی ڈی دی تعداد 3438 اے اتے ایندے اچ آپریشنل فیلڈ آپریٹرز 2776 ہین، تقریبا 32 ہزار توں ودھ ہین جیندے اچ 16 ہزار رجسٹرڈ ہین، دہشتگردی نال نمٹݨ کیتے اینٹی  ٹیررسٹ کورٹس ٻݨائے ڳن جیندے اچوں کے پی اچ 13 اتے بلوچستان اچ 9 کورٹس ہین، دہشتگردی اتنی اے جو ایں سال 22 ہزار 400 توںو دھ آپریشن کیتے ڳن ٻھل پچھلے پورے سال بلوچستان اچ صرف 10  سزائیں ݙتیاں ڳن، خیبر پختونخوا اچ 14 سزائیں ݙتیاں ڳن۔ انہاں آکھیا جو افغانستان نال 6 ملکاں دی سرحد لڳدی اے، باقی ملکاں نال تاں افغانی پاسپورٹ تے آندے ویندن تاں ساݙے پاسو کیوں صرف تذکرے یا شناختی کارڈ تے آون ونڄن؟ ایکوں تہوں سافٹ بارڈر رکھیے جو اے غیرقانونی اسپیکٹرم کوں سہولت ݙیندے، 2023 اچ ایل سیز ڳھٹاوݨ نال افغان ٹرانزٹ ٹریڈ یکدم ارباں ڈالر تئیں ودھ ڳئے، روزانہ کروڑاں دی تیل سمگلنگ تھیندی اے، 50 توں 60 فیصد غیر قانونی سگریٹ وکدن، اے مافیا ہے یا نئیں؟ انہاں آکھیا ڄیکر تساں غیرقانونی اسپیکٹرم نا ڳھٹیسو تاں معیشت کیویں تکڑی تھیسی؟ ایندےاچ ذاتی مفادات ہین جیڑھے کہیں معاملے تے عملدرآمد نئیں تھیوݨ ݙیندے جو مال ٻݨیدن۔ بنوں واقعے تے انہاں آکھیا جو 15 جولائی کوں سویلے دہشتگرداں بنوں کینٹ تے حملہ کیتے جیندے اچ ساݙے 8 جوان شہید تھین اتے ساݙے جواناں ہمت نال مقابلہ کریندے دہشتگرداں کوں ماریے، امن مارچ وی سامݨے اے، ایندے اچ ریاست خلاف نعرے لڳن، پتھرائو کیتا ڳئے، ایندے اچ مسلح لوک وی ہن ڄئیں فائرنگ کیتی اتے کڄھ لوک زخمی تھئن، فوج ایس او پی اتے احکامات دے مطابق ولدا ݙتے، 9 مئی واقعہ دے بعد پراپیگنڈہ شروع کیتا ڳئے جو فوج جتھے کوں روکیا کیوں نئیں؟ فوج دا نظام واضح اے ڄیکر فوجی تنصیبات تے بلو کیتا ویندے تاں پہلے ڳالھ مہاڑ نال روکیا ویندے ول ہوائی فائرنگ کیتی ویندی اے، 9مئی ے سہولت کار، منصوبہ سازاں کوں ڈھل ݙتی ویسی تاں ملک اچ ٻیا فساد کھنݙسی، ہک گروہ اچ شرپسند فائرنگ کر تے لوکاں کوں مریندن تاں انہاں کوں روکݨ روکݨ صوبائی حکومت دا کم اے، بنوں واقعہ تھئے احتجاج پر امن ہووݨا چاہیدے، دہشت گرد واقعات تے کوڑ کڳفھݨی چاہیدی اے، مارچ دہشتگرداں دے خلاف کرو، نور ولی دی کال لیک تھی اے جیندے اچ انہان دا سنیہا پوری قوم سݨیے جو سکول، کالج اݙائو، ہسپتالاں اچ دھماکے کرو ٻھل میݙا ناں نئٰں آوݨا چاہیدا، اے کیہڑا اسلام اے؟ جیندے اچ سکول، کالج اتے ہسپتال اݙاوݨ دا آکھیا ویندے۔