ختم نبوتﷺ تے کامل اتے غیر مشروط ایمان دے بغیر کوئی مسلمان نی تھی سڳدا ،عدالت عظمیٰ، سپریم کورٹ مبارک ثانی کیس اچ نظر ثانی درخواستاں دا فیصلہ سݨا ݙتا

اسلام آباد۔24جولائی(اے پی پی) سپریم کورٹ آف پاکستان مبارک ثانی کیس اچ نظر ثانی درخواستاں دا فیصلہ سݨیندے قرار ݙتے ختم نبوت ﷺ تے کامل اتے  غیر مشروط ایمان دے بغیر کوئی مسلمان نی تھی سڳدا ،عدالت عظمیٰ پنجاب حکومت دی نظر ثانی درخواست وی منظور کرڳھدی ۔ سپریم کورٹ اچ مبارک ثانی کیس اچ نظر ثانی درخواستاں دا فیصلہ چیف جسٹس قاضی فائزعیسیٰ  لکھیے جݙاں جو فیصلہ جسٹس نعیم اختر افغان پڑھ تے سݨائے۔جسٹس نعیم اخترافغان آکھیے فیصلہ اردو اچ لکھیا ڳئے اساں 21 ورقیں تے تفصیلی فیصلہ لکھیے، فیصلے اچ سارے تحفظات کوں سامݨے رکھیا ڳئے ، فیصلے اچ جید علماءدی دی طرفوں ݙتی ڳئی معاونت کوں وی رلائے ، فیصلے اچ قرآن وحدیث دے حوالہ جات وی شامل ہن ، امید اے تفصیلی فیصلہ پڑھݨ نال ابہام نہ رہسی ۔ عدالت عظمیٰ قرار ݙتے حضرت محمد ﷺ دی ختم نبوت تے مکمل اتےغیرمشروط ایمان دے بغیرکوئی مسلمان نی تھی سڳدا ۔عدالت عظمیٰ اپݨے فیصلے اچ آکھیے احمدی اکھواوݨ آلیں دے حوالے نال شریعت کورٹ دے مجیب الرحمان فیصلے کوں اہمیت حاصل اے، احمدیاں دے حوالے نال سپریم کورٹ دے ظہیر الدین فیصلہ وی اہمیت رکھیندے ۔ فیصلے اچ مزید آکھیا ڳئے سپریم کورٹ انھاں  فیصلیں تں انحراف نی کرسڳدی۔ آئین اچ ݙتا ڳیا مذہبی آزادی دا بنیادی حق آئین ،قانون اتے امن عامہ نال مشروط اے۔تحریری فیصلے اچ سپریم کورٹ آکھیے مذہبی آزادی دا بنیادی آئینی حق، قانون ، امن عامہ اتے اخلاق دے تابع اے۔تحریری فیصلے اچ آکھیا ڳئے ختم نبوتؐ تے مکمل اتے غیر مشروط ایمان اسلام دے بنیادی عقیدے اچ شامل اے، آئین پاکستان اچ وی ختم نبوتؐ تے ایمان کوں مسلمان دی تعریف دا لازمی جزو آکھیا ڳئے ، خود کوں احمدی آکھݨ آلیں متعلق مجیب الرحمان اتے ظہیر الدین کیس دے فیصلے موجود ہن ۔عدالتی فیصلے اچ مزید آکھیے عدالت 6 فروری 2024 دے آرڈر اچ انہاں سابقہ نظیراں توں انحراف نی کیتا ، حکومت پنجاب دی نظرثانی درخواست نمبر 2 منظورکیتی ویندی اے ، نظر ثانی دی درخواستاں نمبر 3 اتے 4 مسترد کیتیاں ویندن ۔سپریم کورٹ آکھیے 2019 دے وقوعے تے انہاں دفعات دا اطلاق نی تھی سڳدا  جیڑھا 2021 اچ بطور جرم قانون اچ شامل تھئن