ݙو سال توں جیڑھا آکھدا پیا ہئی میں قوم دی جنگ لڑدا پیاں اڄ او پیر وٹھی کھڑے،عظمی بخاری

لاہور۔27جولائی(اے پی پی) صوبائی وزیر اطلاعات و ثقافت پنجاب عظمی بخاری آکھیے ݙو سال توں جیڑھا بہروپیا آکھدا پیا ہئی میں قوم دی جنگ لڑدا پیاں اڄ او پیر وٹھی کھڑے ، فوجی تنصیبات تے حملے کروا تے، شہدا دے مجسمے ساڑ  تے آپݨے ویلھے دا فرعون معافیاں منگدا پئے ۔ آپݨے ھک بیان اچ انہاں آکھیے محبت دیاں پینگھاں ودھاوݨ تے معافی دے سنھیے کوں عمران خان دی زبان اچ این آر او آکھدن، کل تئیں نیوٹرل ہووݨ جانور تے مندہ ہئی ، اں انہاں کوں ول نیوٹرل تھیوݨ دا آکھدا پئے جیں اڄ تئیں 9مئی دے حملیں دی مذمت نی کیتی او جیل توں نکلݨ سانڳے پینترے بدالی کھڑے ۔ صوبائی وزیر اطلاعات آکھیے ھک درجن ناکام تحریکاں ، فلاپ بیانیے اتے روزانہ کٹھ پتلی شو دے بعد سرنڈر کرݨ ہی بݨدا ہئی ، کجھ دانشوراں کوں وی پتہ لڳ ڳئے جو اے جیل توں نکلݨ سانڳے ہتھ پیر مریندا پیا ہئی ۔ 9مئی دے ماسٹر مائنڈ اتے ایندے سہولت کاراں کوں کوئی معافی نی  ملݨی چاہیدی۔ پاکستان دے عوام منتظر ہن 9مئی دے حملیں اچ ملوث نامزد ملزماں کوں عدالتی نظام کݙاں تئیں کیفر کردار تئیں پڄیندے ، شہدا دے مجسمے ساڑݨ آلے تے انہاں دی مذاق اݙاوݨ آلے کہیں رحم تے معافی دے مستحق کائنی ۔ عظمی بخاری آکھیے جنہاں شہدا دے مجسمے ساڑیے ڳئن انہاں دے لواحقین اڄ وی نظام عدل دے پاسے ݙیکھدے پئن۔17:42