اپوزیشن کوں ھک واری ول مذاکرات دی دعوت ݙیندوں ، انتشار دی سیاست کرݨ آلے ملک دے خیر خواہ کائنی، پاکستان ہے تاں اساں ہیسے، وفاقی وزیر پٹرولیم مصدق

اسلام آباد۔27جولائی(اے پی پی) وفاقی وزیر پٹرولیم مصدق ملک اپوزیشن کوں ھک واری ول مذاکرات دی دعوت ݙیندے آکھیے ملک دی ترقی سانڳے نفرت تے انتشار دی سیاست کوں دفن کرݨا ہوسی ، انتشار دی سیاست کرݨ آلے ملک دے خیر خواہ کائنی ، پاکستان ہے تاں اساں ہیسے ، سیاست اے ملک دشمن عناصر ملکی ترقی اچ رکاوٹاں پیندے پئن ، ملک توں غربت تے بے روزگاری مکاوݨ تے پسماندہ علاقیں دی ترقی وزیراعظم دا وژن اے۔  وفاقی وزیر پٹرولیم مصدق ملک پریس کانفرنس توں خطاب کریندے آکھیے ملک اچ ہر پاسے افراتفری دی سیاست تھیندی پئی اے، حکومت دی طرفوں عوام دی فلاح بہبود سانڳے اقدامات کیتے ویندے پئن اے ݙساوݨ لازمی اے ۔ حکومت عوام کوں ریلیف ݙیوݨ سانڳے کوشاں اے ، وزیراعظم شہباز شریف چاہندن جو ملک اچ روزگار آوݨ یقینی بݨے ، مہانگ مکے اتے پسماندہ رہ ونڄݨ آلے علاقیں تے اتھاں دے واسیاں کوں ملک دے ٻئے علاقیں دے برابر گھن آیا ونڄے ، مہانگ مکݨ نال عوام تے ٻوجھ گھٹ پوسی انہاں آکھیے ملک اچ ایں ویلھے خوارج دے حملے جاری ہن، عمران خان دی ہر ڳالھ تے ایندے حمایتی لبیک آکھدن، پہلے فوج کوں نیوٹرل رہݨ دی ڳالھ کیتی ول پینترا بدال ڳھدا تے آکھیا جو نیوٹرل جانور ہوندے ، ول آکھیا ڳئے چیف قوم دا پیو ہوندے، ول پیو کوں میر جعفر آکھیا ڳیا ، ول امریکہ بارے آکھیا ڳیا جو اوں سازش کیتی ، فوج کوں آکھیا ڳیا جو او ایں سازش توں بچاوے، ول پینترا بدالیا ڳیا اتے آکھیا ڳئے جو فوج اساکوں تباہ کریندی پئی اے ، امریکہ ساݙی مدد کرے، ول امریکی قراردار دا ڈنکا وڄایا ڳئے ، ول اسٹیبلشمنٹ دا قبر تئیں پیچھا کرݨ دا آکھیا ڳیا تے 9 مئی دا واقعہ تھیا جݙاں جو شہدا  دی یادگاراں دی بے حرمتی کیتی ڳئی ، ہݨ ھک واری  ول عمران خان آکھدا پئے جو اسٹیبلشمنٹ نال ڳالھ کریسن ، مسلم لیگ (ن) ساݙی لڑائی کرویندی پئی اے ، انہاں سوال کیتے جو کیا اے بہروپیے ہن یا دیوانے ہن ایجھیاں ڳالھیں کریندے پئن تے ول ول یوٹرن ڳھدے ویندے پئن ، انہاں دا مقصد ڳالھ کرݨ کائنی بلکہ ملک کوں برباد کرݨا اے، اے ٹرینڈ چلیندے رہیے جو کپتان نی تاں پاکستان نی ، انہاں کوں شرم آوݨی چاہیدی جو پاکستان ہے تاں اساں ہیسے ملک تباہ کرݨ دے بیان ݙتے ڳئن تے ایں تے عمل وی کریندے پئن ۔ گزریل سال ملک اچ مہانگ دی شرح 48 فیصد ہئی جیڑھی اجوکے مہینے ݙو فیصد تے آڳئی اے اے ساݙی کاکردگی اے  مہانگ دی مجموعی شرح  38 فیصد توں گھٹ تے 12 فیصد گھن آئی ڳئی اساں بے نظیر انکم سپورٹ پروگرام اچ غریب لوکاں سانڳے 600 ارب روپے رکھئے،  انہاں کووڈ دے بعد غریباں سانڳے گھن آئے ڳئے 4 ارب ڈالر 100 سرمایہ داراں کوں ݙے ݙتے اساں سرکاری شعبہ دے ترقیاتی پروگرام اچ ودھارا کیتے انہاں آکھیے ایں توں ملک اچ روزگار دے موقع بݨسن اساں منیندوں جو بجلی دا ٻوجھ اے لیکن اے ویلھے نال گھٹ تھیسی اساں 86 فیصد صارفین دے بجلی دے ٻل تے پی ایس ڈی پی توں فنڈز کٹ تے سبسڈی ݙتی ،مزید وی غریب کوں سہولت ݙیسوں اساں دہشت گردی مکاوݨ دی ڳالھ کریندوں اے آکھدن اساں آپریشن نہ تھیوݨ ݙیسوں کیا دہشتگردی ، بھتہ خوری، مذہبی جہیں تے حملیں دی اجازت ݙے ݙتی ونڄے انہاں آکھیے اساں آکھدوں ڳالھ کرو اے آکھدن اساں دھرنا ݙیسوں پہیہ جام کریسوں کیا اے ترقی خوشحالی تے روزگار دا پیتھا جام کرݨ چاہندن انہاں کوں دعوت ݙیندوں جو ڳالھ کرو، برباد نہ کرو ، سلجھاؤ ،الجھائو نہ ، اے جیڑھا اودھم مچیندے پئن اے آپݨے ٻالاں دی زندگی اچ مچیندے پئن