فتوے لاوݨ، ریاست اچ ریاست ٻݨاوݨ دیاں کوششاں دی رل تے مذمت کرݨی ہوسی، وزیر قانون و انصاف سینیٹر اعظم نذیر تارڑ

اسلام آباد۔29جولائی(اے پی پی)وفاقی وزیر قانون و انصاف سینیٹر اعظم نذیر تارڑ آکھیے جو فتوے لاوݨ اتے ریاست اچ ریاست ٻݨاوݨ دیاں کوششاں دی رل تے مذمت کرݨی ہوسی، آزادی اظہار رائے دی اݙ اچ قانونی حداں پار کرݨ دی کہیں کوں اجازت نا ݙتی ویسی۔ اے ڳالھ انہاں پاکستان بار کونسل اچ سپریم کورٹ بار ایسوسی ایشن دے عہدیداران نال ملݨ دے بعد میڈیا نال الیندے آکھی۔ انہاں آکھیا جو افغان جنگ دے بعد پاکستان اچ وݙیاں تبدیلیاں آئن، دہشت گردی اتے عدم برداشت وݙا چیلیج اے، سماجی و مذہبی سطح تے اینڄھے رویے ساݙے معاشرے کوں وݙا ضیان ݙتے، چیف جسٹس بارے ڄیڑھیاں خبراں آئن اوندے تے ہک گروہ اپݨا قانون مسلط کرݨ دی کوشش کریندے فتویٰ جاری کیتے ڄیڑھا قابل مذمت وی اے تے قابل دست اندازی جرم وی ہے، جیندے تے گرفتاری وی تھیسی اتے ریاست دی ایندے تے زیرو ٹالرنس ہوسی، ہر شے دی ہک حد ہوندی اے، جتھاں وی قانون شکنی تھیسی، قانون حرکت اچ آسی، ساکوں اپݨے نصاب اچ مذہبی عدم برداشت، سماجی عدم برداشت تے کم کرݨا ہوسی، چیف جسٹس آف پاکستان، پاکستانی آئین، قانون اتے شریعہ دے مطابق فیصلے ݙیندن، کہیں کوں حق نئیں جو او عدالتی فیصلے بارے کوئی دبائو پاوے یا قتل دی دھمکی ݙیوے اتے فتویٰ جاری کرے، ایں بارے حکومت اپݨی ذمہ واری پوری کریسی۔