امن ،سیاسی استحکام ، پالیسیاں دےتسلسل اتے اصلاحات دے بغیر کوئی وی ملک ترقی نی کر سڳدا، احسن اقبال

اسلام آباد۔13اگست (اے پی پی) وفاقی وزیر منصوبہ بندی، ترقی تے اصلاحات پروفیسر احسن اقبال آکھیا جو امن ،سیاسی استحکام ، پالیسیاں دےتسلسل اتے اصلاحات دے بغیر کوئی وی ملک ترقی نی کر سڳدا، آزادی دا ݙینھ کہیں وی قوم کیتے خوشی اتے اتحاد دا ݙینھ ہوندے، اساں ہک متحرک اتے پرعزم نسل ٻݨاؤں جیڑھی چیلنجز دا سامݨا کر سڳے اتے آپݨے ملک کوں عالمی سطح تے نشابر مقام ڳھنݨ اچ کردار ادا کرن۔ اے ڳالھیں انہاں یوم آزادی بارے استحکام پاکستان کانفرنس دے شرکا توں خطاب کریندیں ہوئیں آکھی۔ انہان آکھیا جو یوم آزادی دے ݙینھ عزم کروں جو اساں آپݨی قوم کوں ترقی دی راہ تے ٹریسوں۔ آزادی دا ݙینھ کہیں وی قوم کیتے خوشی اتے اتحاد دا ݙینھ ہوندے۔ اڄ دا ݙینھ اساکوں اسݙی لازوال قربانیاں دی یاد ݙویندے۔ 23 مارچ 1940 کوں قائد جڈاں پاکستان دا خواب ݙٹھا تاں کہیں کوں یقین نہ ہئی جو اے کمزور اتے وسائل توں محروم لوک ہندوستان اچ ہک نویں ریاست ٻݨیسن۔ ایں ملک ڳھٹ عرصے اچ جو حاصل کیتے اوندی مثال نی ملدی۔ انہاں آکھیا جو اڄ ملک ایٹمی طاقت اے۔ جئیں ملک اچ سائیکل دے پرزے تئیں نہ ٻݨدے ہن او ملک جے ایف 17 ٻݨیندا پئے۔ جئیں ملک اچ ہک ݙو یونیورسٹیاں دے علاوہ کوئی اعلیٰ درسگاہ نہ ہئی اڄ اوندی نکر نکر اچ تعلیمی ادارے ہن۔ کانفرنس توں خطاب کریندیں ہوئیں وزیراعظم یوتھ پروگرام دے چیئرمین رانامشہود احمدخان آکھیا جو زندہ قوماں آپݨی غلطیاں توں سبق سکھدن۔ انہاں آکھیا جو ارشد ندیم ثابت کیتے جو عزم ہووے تاں وسائل دی حیثیت نی رہ ویندی۔ حکومت باصلاحیت نینگراں نال تعاون کریندی پئی اے۔