افغان مہاجرین کوں افغانستان واپس بھیجݨ سانڳے وختی ݙوجھا مرحلہ شروع کریسوں، محسن نقوی

لندن ۔15اگست(اے پی پی) وفاقی وزیر داخلہ محسن نقوی دورہ برطانیہ اچ  برطانوی وزیرمملکت خارجہ امور ہمیش فالکنرنال ملاقات کیتی جیں اچ سانجھی دلچسپی دے امور سودھے پاک برطانیہ ݙو طرفہ تعلقات ودھاوݨ تے ڳالھ مہاڑ کیتی ڳئی ۔ برطانوی وزیر  مملکت خارجہ امور یوم آزادی دے موقع تے وفاقی وزیر داخلہ محسن نقوی اتے پاکستانی قوم کوں مبارخ ݙتی ۔ملاقات اچ خطے اچ پائیدار امن و استحکام اتے دہشتگردی دے ناسور نال نبݨݨ تے ڳالھ مہاڑ تھئی ۔ݙوہیں وزراء امن و استحکام سانڳے سانجھا تعاون ودھاوݨ دی لوڑھ تے زور ݙتا۔ وفاقی وزیر  داخلہ محسن نقوی آکھیے اساں افغان مہاجرین کوں انہاں دے ملک واپس بھیڄݨ سانڳے وختی ݙوجھا مرحلہ شروع کریسوں ، انہاں آکھیے پاکستان دہشت گردی توں ساریں توں زیادہ متاثر ملک اے، پاکستان دی سکیورٹی فورسز دہشتگردی دے خلاف جنگ اچ وݙیاں قربانیاں ݙتن۔ انہاں مزید آکھیے دہشتگردی عالمگیر مسئلہ وی اے اتے کئی ملکاں کوں مختلف شکلاں اچ ایندے چیلنج دا سامݨا اے۔ وفاقی وزیر داخلہ محسن نقوی دہشتگردی نال نبݨݨ سانڳے برطانوی تعاون دا خیر مقدم  کریندے آکھیے دہشتگردی دے خلاف سانجھے اقدامات نتیجہ خیز ثابت تھیسن ۔ انہاں ایں ڳالھ تے زور ݙتے جو پاکستان پر امن ملک اے تے خطے اچ پائیدار امن چاہندے ، پاکستان اتے برطانیہ وچال تاریخی دوستانہ تعلقات ہن۔ برطانوی وزیرمملکت خارجہ امور آکھیے پاکستان دولت مشترکہ دا اہم ملک اے، دہشتگردی دے خلاف جنگ اچ پاکستان دیاں قربانیاں کوں منیندوں ۔ پاکستانی ہائی کمشنر ڈاکٹر محمد فیصل اتے برطانوی فارن، کامن ویلتھ اینڈ ڈویلپمنٹ آفس دے اعلی حکام وی اتھاں موجود ہن