قومی اسمبلی سیکریٹریٹ دی نویں سروں تنظیم دا فیصلہ،پہلے مرحلے اچ 90، ݙوجھے اچ 130 غیر ضروری آسامیاں ختم، قومی خزانے کوں ھک ارب سالانہ بچت تھیسی ، سپیکر سردار ایاز صادق دی صدارت اچ فنانس کمیٹی دے اجلاس اچ فیصلیں دی منظوری

اسلام آباد۔15اگست(اے پی پی) کفایت شعاری دی قومی مہم دے تحت وݙا قدم چیندے قومی  اسمبلی سیکریٹریٹ دی گریڈ ھک تں 19 دیاں 220 غیرضروری آسامیاں ختم کرݙتیاں ڳئن جیں توں قومی خزانے کوں 56 کروڑ30 لکھ روپے توں ودھ سالانہ بچت تھیسی جݙاں جو   سپیکر قومی اسمبلی سردار ایاز صادق ھک ارب روپے سالانہ قومی بچت دا ہدف مقرر کرݙتے ۔ قومی اسمبلی دے خرچے گھٹاوݨ سانڳے ترائے مرحلیں اچوں ݙو مکمل کر ڳھدے ڳئن ۔ پہلے مرحلے اچ قومی اسمبلی دی مختلف گریڈز دی 90 غیرضروری آسامیاں ختم کیتیاں ڳئن جنہاں توں 25 کروڑ 52 لکھ 64 ہزار روپے سالانہ دی بچت تھیسی۔ݙوجھے مرحلے اچ گریڈ ھک توں 19 تئیں 130غیرضروری آسامیاں ختم کرݨ نال 30 کروڑ 75 لکھ روپے توں ودھ سالانہ بچت تھیسی ۔ جیں توں مجموعی طورتے 56 کروڑ27لکھ 66 ہزار روپے توں ودھ سالانہ بچت تھیسی جݙاں جو تریجھے مرحلے دے اقدمات توں مزید 40 کروڑ روپے سالانہ بچت تھیسی۔ سپیکر قومی اسمبلی سردار ایاز صادق دی ہدایت تے انھاں اقدامات دا مقصد مجموعی طورتے ھک ارب روپے سالانہ دی بچت کرݨ دا ہدفت گھنݨا اے ۔ سپیکر قومی اسمبلی سردار ایاز صادق دی صدارت اچ فنانس کمیٹی دے اجلاس اچ کفایت شعاری پلان تے عمل درآمد سانڳے اقدامات دی منظوری ݙتی ڳئی جیں دے تحت قومی اسمبلی سیکریٹریٹ دی ضرورتاں موجب آسامیاں دے تعین، مکاوݨ ، تعیناتیاں اتے ترقیاں دے طریقہ کار اچ بہتری اتے شفافیت گھن آئی اے ۔ پریس ریلیز موجب فنانس کمیٹی قومی اسمبلی سیکریٹریٹ اچ مزید بھرتی دا عمل ختم کرݙتے جݙاں جو قومی  اسمبلی سیکریٹریٹ ایمپلائز ایکٹ 2018 دے جائزے اتے اینکوں سول سرونٹس ایکٹ1973 دے تحت وضع کیتے ڳئے رولزنال ہم آہنگ کرݨ سانڳے ذیلی کمیٹی وی بݨائی اے جیڑھی ایں ضمن اچ مناسب ترامیم تجویز کریسی ۔ انھاں ترامیم  دا مقصد قومی اسمبلی دیاں ضرورتاں موجب عملے دی تعداد دا تعین کرݨ تے ترقیاں اتے تعیناتیاں دا نظام چںڳاں بݨاوݨ اے ایں توں علاوہ ایسٹاکوڈ دے تقاضیں موجب کنٹریکٹ منسوخی دی شقاں اچ مناسب ترمیم دے نتیجے اچ قومی وسائل دی بچت اچ مدد ملی اے۔ قومی اسمبلی سیکریٹریٹ دے سارے متعلقہ شعبیں دے نمائندیں تے مشتمل ’ ٹکٹنگ اتے لاجنگ کمیٹی‘ بݨائی ڳئی اے جیں توں امور کار انجام ݙیوݨ اچ شفافیت آسی ایں توں نہ صرف افسراں تے عملے دے امور دا واضح تعین تھیسی بلکہ انہاں دی کارکردگی پرکھݨ اچ ممد ملسی تے مجموعی طور تے وسائل دی بجٹ تھیسی ۔ اجلاس قومی اسمبلی سیکریٹریٹ دی ڈیجیٹلائزیشن دا عمل شروع کرݨ دا فیصلہ کیتے تاں جو جدید ٹیکنالوجی دے استعمال توں کاغذ دے استعمال دا سلسلہ ختم کیتا ونڄے،  پنجاب انفارمیشن ٹیکنالوجی بورڈ دی ٹیم ایں ضمن اچ کم شروع کرݙتے ۔سپیکر قومی اسمبلی سردار ایاز صادق پارلیمنٹ لاجز دے اضافی بلاکس دی وختی تعمیر سانڳے ویلھے دے تعین نال اقدامات یقینی بݨاوݨ دی ہدایت کیتی ۔ یاد رہے ماضی اچ وی سپیکر سردار ایاز صادق پارلیمنٹ ہاؤس کوں شمسی توانائی تے منتقل کرݨ دا انقلابی اقدام چاتے جیں توں کروڑاں روپے سالانہ دی بچت تھئی ہئی