وزیراعظم محمد شہباز شریف دی صدارت اچ اہم اجلاس، منکی پاکس دے تدارک سانڳے مؤثر اتے جامع آگاہی مہم شروع کرݨ دی ہدایت

اسلام آباد۔17اگست(اے پی پی) وزیراعظم محمد شہباز شریف آکھیے عالمی ادارہ صحت دی طرفوں منکی پاکس کوں پبلک ہیلتھ ایمر جنسی قرارݙتا ڳئے جیں دے بعد پاکستان اچ وی ایں بیماری دے حوالے نال تکڑی نگرانی دی لوڑھ اے ۔وزیراعظم آفس میڈیا ونگ توں جاری اعلامیہ موجب وزیراعظم  محمد شہباز شریف  دی صدارت اچ منکی پاکس (Monkey Pox) دے حوالے نال اہم اجلاس تھئے جیں اچ انھاں ملک دے ہوائی اݙیں ، بندر گاہواں تے بارڈرز تے منکی پاکس دی اسکریننگ دے نظام کوں موثر بݨاوݨ ، بارڈر ہیلتھ سروسز کوں صورتحال دی تکڑی نگرانی اتے سخت سرویلنس ، نیشنل کمانڈ اینڈ آپریشنز سینٹر کوں منکی پاکس دی صورتحال تے نظر رکھݨ تے ایں حوالے نال روزانہ جائزہ گھنݨ ،منکی پاکس دی جانچ دے حوالے نال سارے ضروری آلات اتے کٹس ݙیوݨ یقینی بݨاوݨ، منکی پاکس دے کھنڈݨ کوں روکݨ دے حوالے نال صوبائی حکومتاں ، حکومت گلگت بلتستان اتے حکومت آزاد جموں و کشمیر نال رابطے چنڳے کرݨ تے منکی پاکس دے حوالے نال مؤثر اتے جامع آگاہی مہم شروع کرݨ دی ہدایت کیتی ۔ وزیراعظم  آکھیے او منکی پاکس  تے ہفتہ وار بریفنگ گھنسن ۔ بریفنگ اچ اجلاس کوں ݙسایا ڳئے ہݨے ہی ضلع مردان دے ھک بندے اچ منکی پاکس وائرس دی تصدیق تھئی اے،متاثرہ شخص روزگار دے سلسلے اچ ٻاہرلے ملک اچ رہندا پیا ہئی تے ہݨے ہی پاکستان آئے ،متاثرہ بندے کوں انڄ کرݙتا ڳئے ،متاثرہ بندے دی حالت خطرے توں ٻاہر اے ۔ اجلاس اچ ݙسایا ڳئے پاکستان اچ ایں ویلھے منکی پاکس دی لوکل ٹرانسمشن کائنی ۔عالمی ادارہ صحت دی طرفوں 14 اگست 2024 کوں منکی پاکس کوں پبلک ہیلتھ ایمر جنسی قرارݙتا ڳئے جیں دے بعد نیشنل کمانڈ  اینڈ آپریشن سنٹر (این سی او سی )دی طرفوں منکی پاکس دے حوالے نال نیشنل ایڈوائزری تے ضروری ہدایات جاری کیتیاں ڳئن ، وفاقی حکومت اتے صوبائی حکومتاں منکی پاکس تے آگاہی شروع کریندیاں پئن ، ݙسایا ڳئے جو منکی پاکس دے حوالے نال سول ایوی ایشن اتھارٹی ٻاہرلے ملک توں آوݨ آلیاں پروازاں دی نگرانی کریسی ۔صوبائی حکومتاں، حکومت گلگت بلتستان ، حکومت آزاد جموں و کشمیر اتے اسلام آباد کیپیٹل ٹیریٹری انتظامیہ وݙے ہسپتالاں اچ آئیسولیشن وارڈز اتے بسترے منکی پاکس دے ممکنہ مریضاں سانڳے مختص کیتن ،ساریاں وفاقی اکائیاں منکی پاکس دے حوالے نال پیشگی اقدامات کریندیاں پئن۔ اجلاس اچ وزیراعظم دے کوآرڈینیٹرقومی صحت ڈاکٹر ملک مختار احمد بھرتھ ، وفاقی سیکرٹری قومی صحت ندیم محبوب ، چئیر مین نیشنل ڈیزاسٹر مینجمنٹ اتھارٹی لیفٹیننٹ جنرل انعام حیدر ملک، چارے صوبیں ، گلگت بلتستان اتے آزاد جموں و کشمیر دے چیف سیکریٹریز ، چیف کمشنر اسلام آباد کیپیٹل ٹیریٹری اتے متعلقہ اعلیٰ سرکاری افسراں شرکت کیتی