اسلام آباد۔18اگست(اے پی پی) نائب وزیراعظم محمد اسحاق ڈار توانائی دی حفاظت اتے اقتصادی ترقی سانڳے پیٹرولیم سیکٹر دی اہمیت کوں اجاگر کریندے آکھیے صنعت دے مسئلے حل کرݨ سانڳے ایکشن پلان ترتیب ݙیوݨ، مقامی اتے غیر ملکی کمپنیاں کوں سہولت ݙیوݨ سانڳے ہرممکن قدم چاوݨ دا عزم کیتے جیں توں شعبے اچ مزید سرمایہ کاری گھن آوݨ اچ مدد ملسی ۔ دفتر خارجہ توں جاری اعلامیہ موجب نائب …
پیٹرولیم سیکٹردے مسئلیں دے حل سانڳے ایکشن پلان بݨائے ونڄن ، نائب وزیراعظم محمد اسحاق ڈار
اسلام آباد۔18اگست(اے پی پی) نائب وزیراعظم محمد اسحاق ڈار توانائی دی حفاظت اتے اقتصادی ترقی سانڳے پیٹرولیم سیکٹر دی اہمیت کوں اجاگر کریندے آکھیے صنعت دے مسئلے حل کرݨ سانڳے ایکشن پلان ترتیب ݙیوݨ، مقامی اتے غیر ملکی کمپنیاں کوں سہولت ݙیوݨ سانڳے ہرممکن قدم چاوݨ دا عزم کیتے جیں توں شعبے اچ مزید سرمایہ کاری گھن آوݨ اچ مدد ملسی ۔ دفتر خارجہ توں جاری اعلامیہ موجب نائب وزیراعظم دی صدارت اچ پیٹرولیم سیکٹر دی ای اینڈ پی کمپنیاں کوں پیش آندے مسئلیں تے غور سانڳے بݨائی ڳئی کمیٹی دا پہلا اجلاس تھیا۔ ایں موقع تے مقامی تے غیر ملکی ای اینڈ پی کمپنیاں دے سربراہان سرکلر قرضے ودھݨ پاروں سیکٹر دی سکیورٹی تے استحکام متعلق خدشات دا اجلاس کوں ݙسائے ۔ کمیٹی دے نجی شعبے دے ارکان وی ڈاؤن سٹریم گیس سیکٹر متعلق اپݨے خدشات دا اظہار کیتے تے ایندے استحکام کوں چنڳاں بݨاوݨ سانڳے نجی کمپنیاں کیتے سیکٹر کوں کھولݨ دی لوڑھ تے زور ݙتا ، اجلاس اچ تفصیلی بحث و مباحثے دے بعد پیٹرولیم ڈویژن کوں صنعت تے ٻئے سٹیک ہولڈرز نال نیڑے تعاون نال کم کرݨ دی ہدایت کیتی ڳئی ۔ فورم پیٹرولیم ڈویژن کوں اوگرا آرڈیننس اچ مناسب ترمیم تجویز کرݨ دی ہدایت کیتی تاں جو گیس دے نرخاں اچ مہینہ یا ترائے مہینے دی بنیاداں تے ایڈجسٹمنٹ سانڳے ھک میکانزم متعارف کرایا ونڄ سڳسی ۔ سکیورٹی دے مسئلیں تے ، فورم داخلہ ڈویژن کوں ہدایت کیتی جو او ای اینڈ پی کمپنیاں اتے ٻئے سٹیک ہولڈرز نال نیڑے تعاون نال اقدامات کرے۔ اجلاس اچ پیٹرولیم، خزانہ و محصولات اتے توانائی دے وزراء سودھے کمیٹی دے ٻئے سرکاری و نجی شعبے دے ارکان شرکت کیتی۔
