فلسطین دی آزاد ریاست ٻݨݨ ای مسئلہ فلسطین دا پائیدار حل اے، وزیراعظم شہبازشریف دی سبکدوش تھیوݨ آلے فلسطینی سفیر احمد جواد عبد العزیز رابعی نال ملاقات اچ ڳالھ مہاڑ

اسلام آباد۔20اگست  (اے پی پی) وزیراعظم محمد شہبازشریف مسئلہ فلسطین دےمنصفانہ اتے دیرپا  حل کیتے پاکستان دا پکا عزم کریندیں ہوئیں آکھیا جو فلسطین دی  آزاد ریاست ٻݨݨ ای مسئلہ فلسطین دا پائیدار حل اے۔ اے ڳالھیں انہاں منگل کوں فلسطین دے سبکدوش تھیوݨ آلے سفیر احمد جواد عبد العزیز رابعی نال ڳالھ مہاڑ کریندے پئے ہن جنہاں وزیراعظم ہاؤس اچ انہاں نال ملاقات کیتی۔ ملاقات اچ وزیراعظم فلسطینی عوام اتے انہاں دے حق خود ارادیت کیتے پاکستان دی حمایت دا اعادہ کیتا۔ انہاں 7 اکتوبر 2023 توں جاری  غزہ اچ معصوم فلسطینیاں دے خلاف اسرائیل دی جارحانہ کارروائیاں دی شدید مذمت کیتی جئیں پاروں تریمتیں اتے ٻالاں سودھے 40 ہزار توں ودھ بے گناہ فلسطینی شہید اتے 90ہزار توں ودھ زخمی تھیے۔ وزیراعظم ݙوریاستی حل کیتے مسئلہ فلسطین دا منصفانہ اتے دیرپا حل ڳولݨ دی کوششاں کیتے پاکستان دے عزم دا اعادہ کیتا۔ وزیراعظم آکھیا جو اقوام متحدہ دی متعلقہ قرارداداں دے مطابق 1967 توں پہلے دی سرحداں اتے القدس دے دارالحکومت دے طور فلسطین دی ہک آزاد ریاست ٻݨاوݨ ایں مسئلے دا پائیدار حل اے۔ احمد جواد عبد العزیز رابعی آپݨے پںج سال دی تعیناتی اچ پاکستان ولوں بہترین مزمان نوازی تے وزیراعظم دا شکریہ ادا کیتا۔ انہاں مسئلہ فلسطین تے پاکستان دے تاریخی اتے ٹھوس موقف اتے خطے اچ امن تے استحکام کیتے بین الاقوامی کوششاں اچ پاکستان دے کردار دی تعریف کیتی۔  احمد جواد عبد العزیز رابعی فلسطینی طلباکوں پاکستان اچ تعلیم پوری کرݨ کیتے ساری سہولتاں ݙیوݨ اتے وظیفے دی پیشکش تے حکومت پاکستان دا شکریہ ادا کیتا۔