منسک۔21اگست (اے پی پی) پاکستان اتے بیلاروس ݙوپاسہ تعلقات کوں مستحکم ٻݨاوݨ اتے پارلیمانی رابطے کوں ودھاوݨ تے اتفاق کیتے جڈانجو سپیکر قومی اسمبلی سردار ایاز صادق آکھیا جو پارلیمانی سفارتکاری ݙوہیں ملکاں وچ تعلقات کوں ٻیا مستحکم ٻݨاوݨ اچ اہم کردار ادا کر سڳدی اے۔ بدھ کوں سپیکر قومی اسمبلی سردار ایاز صادق بیلاروس دے آپݨے ہم منصب ایگور سرگینکو نال ملاقات کیتی جئیں اچ ݙوپاسہ تعلقات سودھے آپسی …
سپیکر قومی اسمبلی سردار ایاز صادق نال بیلاروس دے ہم منصب ایگور سرگینکو دی ملاقات ، پارلیمانی سفارتکاری تے ڳالھ مہاڑ
منسک۔21اگست (اے پی پی) پاکستان اتے بیلاروس ݙوپاسہ تعلقات کوں مستحکم ٻݨاوݨ اتے پارلیمانی رابطے کوں ودھاوݨ تے اتفاق کیتے جڈانجو سپیکر قومی اسمبلی سردار ایاز صادق آکھیا جو پارلیمانی سفارتکاری ݙوہیں ملکاں وچ تعلقات کوں ٻیا مستحکم ٻݨاوݨ اچ اہم کردار ادا کر سڳدی اے۔ بدھ کوں سپیکر قومی اسمبلی سردار ایاز صادق بیلاروس دے آپݨے ہم منصب ایگور سرگینکو نال ملاقات کیتی جئیں اچ ݙوپاسہ تعلقات سودھے آپسی دلچسپی دے معاملیاں تے ڳالھ مہاڑ کیتی ڳئی۔ ݙوہیں سپیکرز آپسی طور پارلیماناں اچ رابطے ودھاوݨ تے اتفاق کیتے۔ سپیکر قومی اسمبلی ایں موقع تے ڳالھ مہاڑ کریندیں ہوئیں آکھیا جو پاکستان بیلاروس نال تعلقات کوں ٻیا مستحکم ٻݨاوݨ کیتے پرعزم اے اتے دوستانہ تعلقات کوں ٻہوں اہمیت ݙیندے۔ انہاں آکھیا جو پارلیمانی سفارتکاری ݙوہیں ملکاں اچ ٻئے تعلقات کوں مستحکم ٻݨاوݨ اچ اہم کردار ادا کر سڳدن۔ انہاں ݙسیا جو پاکستان دی قومی اسمبلی اچ پاک۔بیلاروس فرینڈ شپ گروپ ٻݨا ݙتا ڳئے۔ انہاں آکھیا جو پاکستان عالمی فورم تے بیلاروس دی حمایت جاری رکھیسی۔ پاکستان شنگھائی تعاون تنظیم اچ بیلاروس دی شمولیت دی حمایت کیتی۔ سپیکر پاکستان دے پارلیمانی وفد دے پرتپاک استقبال اتے مزمان نوازی تے بیلاروس دی حکومت اتے عوام دا شکریہ ادا کیتا۔ سپیکر بیلاروس دے ایوان نمائندگان اچ مزماناں کیتے رکھی ڳئی کتاب اچ آپݨے تاثرات لکھیے۔ بیلاروس دے سپیکر سردار ایاز صادق اتے انہاں دے رلے پارلیمانی وفد دا بیلاروس دا دورہ کرݨ تے خیر مقدم کیتے۔ ایں موقع تے ݙوہیں سپیکر قریبی تعاون اتے آپسی تعاون اتے افہام تے تفہیم دے ودھارے کیتے کوششاں کرݨ تے اتفاق کیتا۔ بیلاروس دے ایوان نمائندگان دے سپیکر ایگور سرگینکو عالمی فورمز تے پاکستان ولوں بیلاروس دے حمایت تے شکریہ ادا کیتا۔
