اقوام متحدہ دی تازہ رپورٹ خوفناک اتے مظلوم فلسطینیاں دی نسل کشی دے اسرائیلی جرم دا تکڑا ثبوت اے، وزیراعظم شہباز شریف

اسلام آباد۔24اگست(اے پی پی)وزیراعظم محمد شہباز شریف فلسطینیاں دی اپݨی سرزمین توں جبری بے دخلی اتے ٻالاں دی غذائی قلت بارے انسانی امور تے اقوام متحدہ دے ادارے (او سی ایچ اے) دی تازہ رپورٹ تے عالمی برادری دے فوری اقدامات دا مطالبہ کریندے آکھیے جو انسانیت دے خلاف جرائم کرݨ آلی اسرائیلی ریاست کوں کٹہرے اچ کھڑا نہ کیتا گیا تاں عالمی ادارے آپ کٹہرے اچ کھڑے ہوسن، عالمی اداریاں دی رپورٹس اسرائیل دے خلاف سنگین فرد جرم اے۔ وزیر اعظم آکھیے جو اقوام متحدہ دی تازہ رپورٹ خوفناک اتے مظلوم فلسطینیاں دی نسل کشی دے اسرائیلی جرم دا تکڑا ثبوت اے، اے رپورٹ گواہی ݙیندی اے جو کوئی ݙینھ اینڄھا نئیں ڄݙاں بے گناہ فلسطینیاں دی رت نا وٹھی ہووے، رپورٹ ݙسیندی اے جو اسرائیل دا سب توں وݙا نشانہ فلسطینی ٻال ٻݨدے پن، صاف ݙسدے جو اسرائیل فلسطینیاں دی نسل مکیندا پئے اتے اے سلسلہ شروع تھئے 322 ݙینھ لنڳ ڳھ، اگست اچ ݙھائی لکھ فلسطینیاں کوں انہاں دے گھراں توں جبری بے دخل کیتا ڳئے ڄیڑھا عالمی اداریاں، عالمی ضمیر اتے عالمی قانون کیتے وݙا چیلنج اچ، صرف ݙو ݙینھ اچ 146 فلسطینیاں دی اپݨے گھراں توں ناحق بے دخلی نال اسرائیلی ظلم دا اندازہ لایا ونڄ سڳدے، اقوام متحدہ دے ادارے دی رپورٹ تصدیق اے جو ہک پاسو مہلک ہتھیاراں نال فلسطینیاں دی نسل کشی جاری اے تاں ٻعے پاسو بکھ کوں ہتھیار ٻݨا تے استعمال کیتا ویندا پئے، شمالی غزہ اچ صرف ہک فیصد اتے جنوبی علاقے اچ چھ فیصد ٻالآں کوں خوراک ملدی پئی اے، اسرائیل فضا، زمین اتے سمندر توں ٻھا اتے بارود وسا تے فلسطینیاں دا قتل عام کریندا پئے۔ وزیر اعظم آکھیا جو اقوام متحدہ دی رپورٹ توں بعد انسانیت دے انہاں قاتلاں کوں سزا ݙتی ونڄے، مظلوماں دا تحفظ کیتا ونڄے، پاکستان فلسطینیاں خاص کر ٻالاں کوں خوراک پچاوݨ اچ ٻیا تیزی ڳھن آسی۔