”دی ڈپلومیٹ“ جریدے اچ چین دے اعلیٰ سطحی وفد دے دورہ پاکستان دے حوالے نال چھپݨ آلا آرٹیکل غلط، بے بنیاد اتے گمراہ کن اے، جریدے پاکستان دے پراݨے یارچین نال تعلقات خراب کرݨ دی ناکام کوشش کیتی، عطاءاللہ تارڑ

اسلام آباد۔31اگست(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ ”دی ڈپلومیٹ“ جریدے اچ چین دے اعلیٰ سطحی وفد دے دورہ پاکستان دے حوالے نال چھپݨ آلے آرٹیکل کوں غلط، بے بنیاد تے گمراہ کن قرار ݙیندے آکھیے جریدے پاکستان دے پراݨے یارچین نال تعلقات خراب کرݨ دی ناکام کوشش کیتی۔ سماجی رابطے دے پلیٹ فارم ”ایکس“ تے آپݨی پوسٹ اچ ”دی ڈپلومیٹ“ جریدے دے شائع تھیوݨ آلے آرٹیکل تے اپݨا ولدا ݙیندے وفاقی وزیر اطلاعات آکھیے پاکستان دی خارجہ پالیسی تے ایہوجیہے حملے کامیاب نہ تھیسن ، آرٹیکل اچ ݙتا ڳیا تاثرغلط، بے بنیاد اتے گمراہ کن اے جیڑھا پاکستان دے عوام دے جذبات کوں ظاہر نی کریندا ۔ ایں توں انڄ وزارت اطلاعات دے فیکٹ چیکر وی ”دی ڈپلومیٹ“ جریدے اچ چین دے اعلیٰ سطحی وفد دے دورہ پاکستان دے حوالے نال شائع تھیوݨ آلے آرٹیکل کوں گمراہ کن تے بے بنیاد قرارݙتے ۔ سماجی رابطے دے پلیٹ فارم ”ایکس“ تے آپݨی پوسٹ اچ وزارت اطلاعات آکھیے آرٹیکل کوڑا تے سیاق و سباق توں ہٹ تے لکھیا ڳئے ، غیر ملکی شخصیات دے دورے پورا سال جاری رہندن ، مذکورہ آرٹیکل اچ چین دے اعلیٰ سطحی وفد دے دورے اتے دہشت گردی دے واقعات وچال گمراہ کُن ربط پیدا کرݨ دی کوشش کیتی ڳئی ، اے آرٹیکل گمراہ کن اتے بے بنیاد اے۔