سٹیٹ بینک دی پالیسی ریٹ اچ 2 فیصد کمی وپار اتے معیشت کیتے ٻہوں سوھݨی اے، آئی ایم ایف نال معاملات چنڳے ٹردے پن، وزیراعظم دی کابینہ اجلاس اچ ڳالھ مہاڑ

اسلام آباد۔12ستمبر(اے پی پی)وزیراعظم محمد شہباز شریف سٹیٹ بینک دی پالیسی ریٹ اچ 2 فیصد کمی کوں وپار اتے معیشت کیتے ٻہوں سوھݨا قرار ݙیندے آکھیے جو آئی ایم ایف نال معاملات چنڳے ٹردے پن، دعا اے جو مہنگائی آلی کار پالیسی ریٹ وی سنگل ڈیجٹ اچ آ ویسی۔ اے ڳالھ انہاں اسلام آباد اچ تھیوݨ آلے وفاقی کابینہ دے اجلاس دی اڳواݨی کریندے آکھی۔ انہاں آکھیا جو کابینہ اجلاس دی شروعات پالیسی ریٹ اچ کمی دی چنڳی خبر نال تھیندی پئی اے ایندے نال کاروبار، زراعت اتے قومی معیشت کوں فیدہ پڄسی اتے اتے اللہ دے فضل نال پالیسی ریٹ وی تیکھے سنگل ڈیجٹ تے آ ویسی اتے ملکی معیشت کوں رنگ لڳ ویسن۔ انہاں آکھیا جو ملکی معیشت اچ روز ݙیہاڑی بہتری آندی پڑی اے، مہانگ اتے پالیسی ریٹ اچ کمی چنڳی اڳوںہی اے، ایندے نال ساݙی صنعت، سرمایہ کاری، تجارت، برآمدات، زراعت ساریاں کون فیدہ تھیسی، آئی ایم ایف نال ڳالھ مہار چنڳی ٹردی پئی اے، آئی ایم ایف پروگرام دے مکمل تھیوݨ دے بعد اساں اپݨی شرح نمو ودھاوݨ دے اقدامات کریسوں، پاور سیکٹر اتے ایف بی آر اچ اصلاحات تھینداں پن، ایف بی آر اچ ودھ کم کرݨ دی لوڑھ اے، معاملات اچ بہتری اتے اہداف سانڳے کیتے چیئرمین ایف بی آر نال آپ ملساں، آئی ایم ایف نال الاوݨ کیتے ساݙے سنڳتی اتے ٻھرا ملکاں پورا ہتھ ونݙائے اتے انہاں ملکاں اڳین آلی کار ٻھراواں آلا ڄذبہ ݙکھائے اتے پاکستان دے نال تھئین، ساکوں معاملات سدھے کرݨ کیتے قرضیاں توں جان چھڑاوݨی ہوسی اتے اپݨے پیریں تے کھڑا تھیوݨا ہوسی۔ انہاں آکھیا جو اے کوئی راکٹ سائنس نئین ہک سادہ ڳالھ اے، حکومت ملکی معاملات کتیے ودھ پوہریا کریندی پئی اے جیندی تفصیل ول ݙسا ݙیسوں، آئی ایم ایف دے مطالبات کیتے وزیر خزانہ، کابینہ، اداریاں دے سربراہواں سودھا متعلقہ حکام ودھ کوشش کیتی اے اتے ایندے اچ وݙی کامیابی تھیسی، چین سودھا دفتر خارجہ اتے ٻئی سنڳت ودھ ہتھ ونݙائے۔ انہاں آکھیا جو فلسطین اچ اسرائیل دی بربریت اور قتل و غارت انسانی تاریخ دا سیاہ باب اے، ایں سانڳے عالمی ضمیر کوں جاڳݨا ہوسی، اقوام متحدہ، سلامتی کونسل، ہیگ اچ منظور تھیوݨ آلی کہیں وی قرار داد دی اسرائیل کوئی پرواہ نئیں کیتی، عالمی طاقتاں دی کوشاں دا وی کوعی نتیجہ نئیں نکلیا تہوں اڄ اقوام متحدہ ریلیف (پولیو اتےر خوراک )دے 6 کارکناں کوں قتل کر ݙتا ڳئے، ڄیکر اے کہیں ٻئے ملک اچ ہوندا تاں انت مچ ویندا، فلسطین اچ روزانہ نہتے مسلمان شہید تھیندے پن، ماضی اچ وی پاکستان اسرائیلی جارحیت دی ودھ مذمت کیتی اے اتے اڄ دے واقعے دی شدید مذمت کریندے ہیں اتے اے معاملہ ہݨ مذمت توں اڳو نکل ڳئے، عالمی ضمیر کوں جاگݨا چاہیدے اتے اپݨا فرض ادا کرݨا چاہیدے۔