اسلام آباد۔26دسمبر (اے پی پی) وزیراعظم محمد شہباز شریف آکھیا جو قائداعظم محمد علی جناح پاکستان اتے ماؤ زے تنگ جدید چین دا منڈھ بدھیا۔ پاکستان اتے چین دے تاریخی تعلقات آپسی احترام اتے اعتماد دی بنیاد تے ہن۔ پاکستان اتے چین دی آل ۔ویدر اسٹریٹجک پارٹنر شپ نویں بلندیاں تے ویندا پئے۔ عالمی امن تے خوشحالی کیتے پاکستان اتے چین رَل تے کم کر سڳدن۔ اے ڳالھیں انہاں خمیس کوں ممتاز چینی آرٹسٹ تے مجسمہ ساز ماسٹر یوآن شیکم نال ملاقات اتے 25 دسمبر کوں قائد اعظم اتے 26 دسمبر کوں ماؤ زے تنگ دی سالڳنڈھ دی مناسبت نال انہاں دے اسکلپچرز (مجسمیاں ) دی نقاب کشائی دی تقریب توں خطاب کریندے ہوئیں آکھی۔ ایں موقع تے چیئرمین ماؤ زے تنگ دی بھتریجی مادام ماؤ شیاؤ چنگ وی موجود ہن۔ ماسٹر یوآن دے بݨآئے ہوئے قائد اعظم محمد علی جناح اتے چیئرمین ماؤ زے تنگ دےمجسمیاں بارے خصوصی تقریب 25 دسمبر کوں قائد اعظم اتے 26 دسمبر کوں ماؤ زے تنگ دی سالڳنڈھ دی مناسب نال کیتا ڳئیا۔ وزیراعظم پاکستان آوݨ تے یوآن کوں خوش آمدید آکھیا۔ انہاں قائد اعظم اتے چیئرمین ماؤ دا شاندار اسکلپچرز ٻݨاوݨ تے ماسٹر یوآن دا شکریہ ادا کیتا اتے انہاں کوں خراج تحسین پیش کیتا۔ انہاں آکھیا جوچیئرمین ماؤ زے تنگ دی عزت تے احترام ہر پاکستانی دے دل اچ اے۔ انہاں آکھیا جو پاکستان اتے چین دی آل ۔ویدر اسٹریٹجک پارٹنر شپ نویں بلندیاں تے ویندی پئی اے۔ وزیراعظم شہباز شریف آکھیا جو چین۔پاکستان اقتصادی راہداری منصوبے توں ڳھن تے دفاع اتے دفاعی پیداوار اتے زراعت دے شعبیاں اچ تعاون ٻیا بہتر تھیندا پئے۔پاکستان توں زراعت دے شعبے دے گریجویٹ دا پہلا بیچ چینی زرعی یونیورسٹیاں اچ تربیت اتے تحقیق دی غرض نال جلدی چین ویسی۔ ماسٹر یوآن تقریب توں خطاب کریندیں ہوئیں آکھیا جو اڄ اتھ پاکستان آوݨ انہاں کیتے خوشی دی ڳالھ اے۔
قائد اعظم محمد علی جناح اتے چیئرمین مائوزئےتنگ عظیم لیڈرہن۔ انہاں دی عظمت میکوں انہاں دے مجسمے ٻݨاوݨ تے مجبور کیتے۔ سی پیک دے ݙاہ سال پورے تھیوݨ تے ݙوہیں رہنماواں دے مجسمے ٻݨاوݨ تے فخر اے۔ ایں توں پہلے ماسٹر یوآن وزیراعظم محمد شہباز شریف کوں آپݨے ٻݨائے ہوئے ݙوہیں رہنماواں دے مجسمیاں دا خاکہ پیش کیتا۔ تقریب اچ وفاقی وزیر اطلاعات ، نشریات تے ثقافت عطاء اللہ تارڑ ، وزیراعظم دے معاون خصوصی طارق فاطمی ،پاکستان اچ تعینات چینی سفیر جیانگ ژی ڈونگ ، چین اچ تعینات پاکستانی سفیر خلیل ہاشمی اتے سرکاری افسرموجود ہن۔
