“نادرا موبائل ایپ” لانچ کرݨ تے 3 نویں ریجنل دفتر بݨاوݨ دا فیصلہ، 17 جنوری توں پاک آئی ڈی ویب سائٹ بند ، ساری خدمات موبائل ایپ تے ݙتیاں ویسں ، محسن نقوی

اسلام آباد۔16جنوری(اے پی پی) وفاقی وزیر داخلہ محسن نقوی دی خصوصی ہدایت تے “نادرا موبائل ایپ” لانچ کرݨ تے 3 نویں ریجنل دفتر بݨاوݨ دا فیصلہ کیتا ڳئے ، 17 جنوری توں “پاک آئی ڈی ویب سائٹ” بند کیتی ویندی پئی اے ۔ وزارت داخلہ توں جاری بیان موجب وفاقی وزیرداخلہ محسن نقوی آکھیے 3 نویں ریجنل سینٹرز آزاد جموں و کشمیر، گوادر اتے گلگت بلتستان اچ بݨائے ویسن  انہاں آکھیے نادرا دی پاک آئی ڈی ویب سائٹ بند کر تے ساری خدمات ہݨ موبائل ایپ تے ݙتیاں ویسن ، ویب سائٹ دے استعمال اچ شہریاں بالخصوص ٻاہرلے ملک رہݨ آلے پاکستانیاں کوں اوکھ تھیندی پئی ، جیویں جو انگلیاں دے نشانات اتے مطلوبہ دستاویزات سکین کرتے اپ لوڈ کرݨ اچ پریشانی تھیندی ہئی۔ وفاقی وزیر داخلہ آکھیے جعلساز عناصر نقلی ویب سائٹس دے ذریعے شناختی دستاویزات بݨواوݨ اچ معاونت دا کاروبار کریندے پئے ہن ،شہریاں دی ذاتی معلومات گھن تے انہاں دا غلط استعمال کرݨ دی کوشش کیتی ویندی پئی ہئی ۔ انہاں آکھیے انہاں سرگرمیاں دے تدارک سانڳے 17 جنوری توں ویب سائٹ بند کیتی ویندی پئی اے ۔  وزارت داخلہ تے وزارت خارجہ جعلساز عناصر دا سختی نال نوٹس ڳھدے ، نادرا ٻئے اداریں نال رل تے انہاں عناصر دے خلاف کارروائی یقینی بݨیندا پئے ۔ وفاقی وزیر داخلہ مزید آکھیے نادرا دی موبائل ایپ کوں پہلے توں مزید بہتر بݨایا ڳئے ۔ شناختی کارڈ، نائکوپ، پی او سی ، ب فارم ، ایف آرسی سودھے ساری خدمات موبائل ایپ تے دستیاب ہن۔ انہاں آکھیے شہری ہݨ گھر ٻیٹھے موبائل ایپ تے شناختی دستاویزات دی ساری کارروائی مکمل کرسڳدن ۔ وفاقی وزیر داخلہ محسن نقوی آکھیے نویں ریجنل دفتر 31 مارچ توں کم شروع کرݙیسن انہاں دفتراں دے بݨم نال نادرا حکام اتے شہریاں وچال رابطے اچ سوکھ تھیسی ۔ انہاں مزید آکھیے ریجنل دفتر دے قیام توں پرے دے علاقیں دے نادرا مراکز اچ خدمات دی فراہمی بہتر تھیسی، شہریاں دے مسئلے تکھے حل تھیسن تے شکایتاں دا وختی ازالہ تھیسی۔ وزیر داخلہ محسن نقوی آکھیے 31 مارچ تئیں ملک دیاں ساریاں تحصیلاں اچ نادرا دفاتر بݨاوݨ دا ہدف پورا کرڳھدا ویسی ہݨ تئیں پورے ملک اچ صرف 19 تحصیلاں اچ نادرا دفتر دا قیام باقی ہئی۔ ایں ضمن اچ کم تکھے جاری اے ، 31 مارچ تئیں انہاں تحصیلاں اچ وی نادرا  دفتر فعال تھی ویسن۔