ماہی گیر گجہ ڄال جیھے ممنوعہ ڄالاں دے استعمال کوں ختم کرن ،اے سمندری حیات دی افزائش کوں ضیان پڄاوݨ دے نال نال پاکستان دی عالمی سطح تے بدنامی دا باعث بݨدے پئن، قیصر احمد شیخ

اسلام آباد۔17جنوری (اے پی پی) وفاقی وزیر بحری امور قیصر احمد شیخ پاکستان اچ آبی زراعت دے شعبے اچ موجود بے پناہ مواقع دے غیر مستعمل رہݨ تے تشویش کریندے آکھیے ملک دی 1,100 کلومیٹر طویل ساحلی پٹی اتے 240,000 مربع کلومیٹر دے خصوصی اقتصادی زون جیھے قیمتی وسائل کوں مؤثر انداز اچ بروئے کار گھن آوݨ دی لوڑھ اے تاں جو انہاں توں ملکی معیشت کوں مستحکم کیتا ونڄ سڳے ۔ اے ڳالھ انہاں منعقدہ نیشنل ورکشاپ آن دی پروموشن آف ایکوا کلچر ان پاکستان توں خطاب اچ آکھی ۔ وفاقی وزیر ایں ڳالھ تے زور ݙتے جو پاکستان قدرتی وسائل توں مالا مال تھیوݨ دے باوجود انھاں توں خاطر خواہ فیدہ نی چیندا پیا ، انہاں آکھیے دنیا تکھے ترقی کریندی پئی اے تے پاکستان کوں وی آبی زراعت جیھے اہم شعبے تے بھرپور توجہ ݙیوݨی ہوسی ، انہاں ایں شعبے کوں پیش آندیاں رکاوٹاں جنھاں اچ پیچیدہ قوانین، روایتی طریقہ کار تے جدید ٹیکنالوجی دی کمی شامل ہن، دی نشاندہی کیتی تے بین الاقوامی معیار موجب حفظان صحت اتے سلامتی دے اصولاں تے عملدرآمد کوں ناگزیر قرارݙتے ۔ وفاقی وزیر آکھیے سعودی عرب، متحدہ عرب امارات اتے امریکہ جیھے ملکاں پاکستان دی سمندری خوراک دی برآمدات تے اعتراضات چاتن جنہاں کوں حل کیتے بغیر عالمی منڈی تئیں رسائی ممکن کائنی ۔ وفاقی وزیر سندھ دے ماہی گیراں توں اپیل کیتی جو او گجہ ڄال جیھے ممنوعہ ڄالاں دا استعمال ختم کرن کیوں جو اے سمندری حیات دی افزائش کوں ضیان پڄاوݨ دے نال نال پاکستان دی عالمی سطح تے بدنامی دا باعث بݨدے پئن انہاں قوانین کوں سوکھا بݨاوݨ دی لوڑھ تے زور ݙیندے نینگراں کوں سرکاری ملازمتاں دے بجائے کاروبار دے پاسے آوݨ دی ترغیب ݙتی ۔ورکشاپ اچ ماہی گیری دے شعبے نال وابستہ لوک ، فیڈ ملرز، غیر سرکاری تنظیماں تے حکومتی اداریں شرکت کیتی۔ ایں موقع تے شرکاء آبی زراعت دے شعبے کوں جدید خطوط تے استوار کرݨ تے سمندری خوراک دی برآمدات ودھاوݨ سانڳے تجویزاں پیش کیتیاں