ملک کوں معاشی بحران توں کڈھݨ سانڳے ݙینھ رات کم کریندے پیوں ، وفاقی وزیر توانائی سردار اویس احمد خان لغاری

ڈیرہ غازی خان۔ 18 جنوری (اے پی پی) وفاقی وزیر توانائی سردار اویس احمد خان لغاری آکھیے پاکستان مسلم لیگ (ن )دی حکومت عوام دی فلاح و بہبود سانڳے کم کریندی اے ،ملک کوں معاشی بحران توں کڈھݨ سانڳے ݙینھ رات کم کریندے پیوں ، ملک دے پرے دے علاقیں اچ بجلی ݙیوݨ ترجیح اے۔ اے ڳالھ انہاں ڈیرہ غازی خان دے نواحی علاقہ سخی سرور دے رہائشیاں نال ڳالھ مہاڑ کریندے آکھی ۔ایں موقع تے رکن پنجاب اسمبلی سردار احمد خان لغاری،مسلم لیگی رہنما و سابق چیئرمین چیف کھلنگ حاجی ملک ارشاد حسین،میر مرزا تالپور تے ٻئے رہنما وی موجود ہن ۔سردار اویس لغاری آکھیے پاکستان مسلم لیگ (ن) دی حکومت عوامی خدمت تے یقین رکھیندی اے ،عام آدمی دا معیار زندگی اُچا کرݨ سانڳے پکے اقدامات کریندے پیوں انہاں آکھیے ساݙی کوشش اے جو سستی بجلی ݙتی ونڄے تے عوامی مسئلے وختی حل کیتے ونڄن ۔ ایں موقع تے وفاقی وزیر توانائی سخی سرور دا معائنہ کریندے ستھرا پنجاب مہم دے حوالے نال صفائی سودھے ٻئے امور داجائزہ گھندے علاقے اچ صفائی دا انتظام چنڳاں کائنی انتظامیہ وختی ایں مسئلے تے توجہ ݙیوے ۔ انہاں سول ہسپتال سخی سرور دا وی دورہ کیتا،مریضاں دی تیمارداری کیتی تے ݙتیاں ڳیاں طبی سہولتاں دا پچھیا ۔وفاقی وزیر سٹاف دی کمی، مناسب سہولتاں تے مشیناں فعال نہ تھیوݨ تے کاوڑ کریندے رپورٹ منڳ ڳھدی ، انہاں آکھیے ہسپتال اچ ڈاکٹرز دی تعداد ٻہوں گھٹ تے انہاں اچ وختی ودھارا ناگزیر اے تاں جو اتھاں دے شہریاں کوں مناسب طبی سہولتاں ݙتیاں ونڄ سڳن۔