تحریک انصاف سیاست توں مذہب کوں ھک پاسے رکھے، 190 ملین پائونڈ کیس دا قانونی دفاع نی کر سڳیے تاں مذہب کارڈ کھیݙݨ شروع کرݙتے، 190 ملین پاؤنڈ کیس اچ کوئی ابہام اتے سقم کائنی ، عطاءاللہ تارڑ

لاہور۔18جنوری(اے پی پی) وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے تحریک انصاف سیاست توں مذہب کوں پرے رکھے ، 190 ملین پائونڈ کیس اچ اے قانونی دفاع نی کرسڳیے تاں مذہب کارڈ کھیݙݨ شروع کر ݙتے ، 190 ملین پائونڈ اوپن اینڈ شٹ کیس ہئی جیں اچ کوئی کوئی ابہام اتے قانونی سقم کائنی، پوری پی ٹی آئی کوں چیلنج اے ݙساوے 190 ملین پاؤنڈ دی رقم این سی اے پاکستان کوں نی ݙتی ؟ کیا اے پیسہ ایں بندے دے حوالے نی کیتا گیا جیں کوں ضبط کیتا ڳئے ؟ اے لوک اپݨی کرپشن لکاݨ سانڳے سیرت کوں ڈھال بݨیندے پئن ۔ علماءکرام دے رلے اہم پریس کانفرنس توں خطاب کریندے وفاقی وزیر اطلاعات آکھیے 190 ملین پائونڈ کیس دا عدالتی فیصلہ پاکستان دی تاریخ دا ھک اہم ترین فیصلہ اے، 190 ملین پائونڈ اوپن اینڈ شٹ کیس ہئی جیں اچ کوئی ابہام تے قانونی سقم کائنی، پاکستان دی تاریخ اچ وݙے وݙے کیسز آئے لیکن ایں طرح دا کلیئر کٹ کیس اساں پہلے کݙاہیں نی ݙٹھا ، ایں کیس اچ شواہد دی بنیاد تے سزا تھئی ، کیس دے حوالے نال کجھ دستاویزات وی سامݨے آئن ، پی ٹی آئی دور اچ شہزاد اکبر دی سربراہی اچ ایسٹ ریکوری یونٹ بݨیا جیں 2020ءاچ ھک خط اچ آکھیے حکومت پاکستان کوں اے رقم ریکور کرتے ݙے ݙتی اے ، اوں ویلھے دی کابینہ توں بند لفافے دی منظوری ڳھدی ڳئی تے اے رقم اوں بندے کوں واپس کرݙتی ڳئی جیں توں ضبط کیتی ڳئی ہئی ۔ انہاں آکھیے اے پاکستان دی تاریخ دا ساریں توں وݙا ڈاکہ اے ایں کیس اچ بانی چیئرمین پی ٹی آئی اتے شریک ملزمان کوں سزاتھئی اے ۔ انہاں آکھیے اے ڳالھ طے شدہ ہے جو این سی اے اے پیسہ ضبط کرتے پاکستان دی حکومت کوں ݙتا کیوں جو اے پاکستان دے عوام دا پیسہ ہئی۔ انہاں آکھیے اے رقم حکومت پاکستان کوں ایں سانڳے ݙتی ڳئی ہئی جو پاکستان دی فلاح و بہبود، تعلیم، صحت، سڑکاں، صاف پاݨی سانڳے خرچ کیتی ونڄے ، بانی چیئرمین پی ٹی آئی اتے انہاں دی ذال ایں پیسے دے عوض پنج قیراط دیاں مندریاں منڳیاں ، زمان پارک اچ 25 کروڑ روپے دا گھر ڳھدا ۔ انہاں آکھیے ہر بند دا ذریعہ آمدݨ ہوندے اے ݙسایا ونڄے جو بانی چیئرمین پی ٹی آئی دا ذریعہ آمدن کیا اے؟ انھاں کنے کیڑھی آمدݨ ہے جیں توں انہاں زمان پارک لاہور اچ 25 کروڑ روپے دا گھر بݨائے، 200 کنال زمین مل ڳھدی ، نیشنل کرائم ایجنسی برطانیہ دا مایہ ناز تحقیقاتی ادارہ اے جیں اے رقم پاکستان دے حوالے کیتی جݙاں جو بانی چیئرمین پی ٹی آئی رشوت گھن تے اے پیسہ اوں بندے دے حوالے کرݙتا جیں توں ضبط کیتا ڳیا ہئی انہاں کنے کوئی قانونی جواز کائنی جݙاں انہاں کوں کوئی چیز سمجھ نی آئی تاں آکھیا ڳئے جو سیرت تے چلݨ دی سزا ڈتی ڳئی ۔ پی ٹی آئی اے کیس سیاسی طور تے لڑیا ایں اچ کوئی لیگل ڈیفنس کائنی ۔ میاں بیوی ھک فراڈ ٹرسٹ بݨایا، ہݨ آکھدے پئن جو القادر یونیورسٹی اچ سیرت دیاں کلاساں پڑھائیاں ویندن اے ہر ڳالھ اچ مذہب کوں گھن آندن ، پی ٹی آئی سیاست توں مذہب کوں ھک پاسے رکھے ، انہاں آکھیے مسجد نبوی اچ ادب دا خاص خیال رکھیا ویندے ، عقیدتاً اتھاں اچی آواز اچ ڳالھ نی کیتی ویندی انہاں اتھاں شاہ زین بگٹی دے وال چھکیے ، مریم اورنگزیب دا گھیرائو کر تے نعرے لاتے، اے عمرے سانڳے وی ویندن تاں پارٹی دے جھنڈے نال گھن ویندن ، علیمہ خان صاحبہ دا آکھݨ اے جو 190 ملین پائونڈ کائنی بلکہ اے القادر ٹرسٹ کیس اے، اے وی مذہبی ٹچ اے جو ناں وی القادر ٹرسٹ آکھیا تے پکاریا ونڄے انہاں دے جرائم پوری دنیا دے سامݨے آ چکن ، پوری دنیا انہاں کوں ݙیکھ چکی اے ، جݙاں کابینہ اچ بند لفافہ پیش کیتا ڳیا تاں خان صاحب خود آکھیا نی کھولݨا ، فواد چودھری اتے شیریں مزاری آکھیے اے لفافہ کھولو ، مراد سعید وی سوالات چاتے مگر اے بند لفافہ کھولݨ نی ݙتا ڳٰا لکایا اوں چیز کوں ویندے جیں اچ گڑ بڑ ہووے ، انہاں بند لفافے دے تحت اے پیسہ سپریم کورٹ دے اکائونٹ اچ کہیں جرمانے دی مد اچ ادا کیتا ، سپریم کورٹ دا آرڈر موجود اے جیں اچ آکھیا ڳئے جو تساں غیر قانونی عمل کیتے، تساں کنے کوئی قانونی جواز ہے ؟ انہاں آکھیے اتنی وݙی رقم چاتے اوں بندے دے حوالے کرݙتی ڳئی جیں توں ضبط کیتی ڳئی ہئی کیا اے بندہ کلھا اتنی سکت رکھیندے او باننی چیئرمین پی ٹی آئی اتے انہاں دی ذال دے بغیر اے پیسہ اپݨے ناں کروا ڳھندا۔ کیا کابینہ دے ایں فیصلے دے تحت حکومت پاکستان کوں ضیان تھئے؟ جواب ہے ہا، ملک ریاض کوں فیدہ تھئے ؟ جواب اے ہا! تاں کرپشن، رشوت اتے ڈاکہ ثابت اے، تساڈے ہتھ رشوت اچ رنگ ڳئن ۔ وفاقی وزیر آکھیے ھک الزام کوں جھٹلاوݨ سانڳے سیرت اتے نبی کریم ؐدا ناں گھنݨ جائز کائنی ، کیا چوری دے پیسے توں مسیت یا مدرسہ بݨاوݨ جائز اے ؟ صادق تے امین دے دعویدار دا اصل چہرہ قوم دے سامݨے آ چکے۔ سابق وزیراعظم دی کرپشن، ڈاکہ اتے غبن دی پوری دنیا اچ ہیڈ لائنز لڳیاں پئن جݙاں او اتھاں مذہب کارڈ کھیݙدے پئن ، مذہب ٻہوں مقدس اے جݙاں جو  سیاست اتنی مقدس کائنی ، تساں کوڑ ، منافقت، کرپشن اتے ڈاکے کوں لکاوݨ سانڳے دا سہارا گھندے پیو ساݙا مطالبہ اے جو مذہب کوں وچ نہ گھن آؤ ۔ ھک سوال دے جواب اچ وفاقی وزیر اطلاعات آکھیے القادر یونیورسٹی حکومت دی تحویل اچ ݙے ݙتی ڳئی اے ہݨ اے ݙیکھݨا اے جو ایں کوں کیڑھی سطح تے گھن ونڄݨا اے اتھاں کیویں اعلیٰ تعلیم ݙتی ونڄ سڳدی اے جیڑھے لوک 190 ملین پائونڈ کیس اچ مفرور ہن انہاں دی واپسی سانڳے قانونی ٹیم کم کریندی پئی اے ھک ٻئے سوال دے جواب اچ انہاں آکھیے 190 ملین پائونڈ کیس اچ پی ٹی آئی دور دی باقی کابینہ دے ارکان کیوں ملوث کائنی ؟ فواد چوہدری ملک ریاض توں نہ مندری ڳھدی نہ فیدہ ڳھدا نہ شیریں مزاری اے کم کیتا جنہاں لوکاں رشوت اتے فیدے ڳھدے انہاں ہی فراڈ ٹرسٹ بݨایا، پہلے ایں ٹرسٹ ڈیڈ تے زلفی بخاری دا ناں ہئی ول میاں بیوی دا ناں آڳیا۔ انہاں آکھیے ساݙا مطالبہ اے جو اپیل پہلے آوے ایں تے پہلے کارروائی تھیوݨی چاہیدی اے، اے نی تھی سڳدا جو عام آدمی دیاں اپیلاں سالاں پیاں رہن تے وی وی آئی پیز دیاں اپیلاں پہلے سݨیاں ونڄن ۔ انہاں آکھیے 190 ملین پاؤنڈ کیس اچ پراسیکیوشن شواہد پیش کیتے لیکن ڈیفنس کونسل کوئی ثبوت اتے قانونی جواز نی ݙے سڳی ۔ اپیل سانڳے وی انہاں کنے کوئی جواز کائنی ۔ مذاکرات دے حوالے نال سوال دے جواب اچ وزیر اطلاعات آکھیے مذاکرات دا قطعاً مقصد ڈیل یا این آر او کائناں ہئی ایں دا مقصد سیاسی استحکام ہئی ، پی ٹی آئی 26 ویں آئینی ترمیم تے ساݙے رلے تھیے انہاں دے آکھݨ تے 26 ویں آئینی ترمیم اچوں کئی شقاں کڈھیاں ڳئن انہاں آکدھیے پی ٹی آئی نال ڳالھ مہاڑ دا سلسلہ جاری اے ، مسئلے ڳالھ مہاڑ نال ہی حل تھی سڳدن ، این آر او یا ڈیل سانڳے کوئی ڳالھ کائنی تھیندی پئی ۔ انہاں پی ٹی آئی کوں مشورہ ݙتے” ایاک نعبدو ایاک نستعین پڑھدے ہن تاں ایندے بعد اھدنا الصراط المستقیم “وی پڑھیا کرن۔ ایں موقع تے علماءکرام آکھیے کہیں دا پیسہ لٹ تے یونیورسٹی نی بݨائی ونڄ سڳدی ۔ 190 ملین پاؤنڈ کیس اچ کرپشن واضح اے، کرپشن تے اسلام دا لیبل نی لاتا ونڄ سڳدا ۔ پی ٹی آئی دور حکومت اچ دینی مدارس اتے جامعات نال ظلم تھئن تے بے حرمتی تھئی ، اسلام، دین اتے نبی کریم ؐدی ذات پاک مقدس اے، ایں تے ساݙا ایمان اے، پاکستانی غیور قوم اے، مسلمان اپݨا سارا کجھ اللہ اتے رسول دے ناں تے پیش کریندن تساں آپݨی سیاست کرو ، تساکوں سیاست دا پورا حق اے لیکن سیاست دی آڑ اچ آپݨی چوری تے ریاست مدینہ دا ناں نہ گھنو ۔ پاکستانی قوم اتے مسلمان کݙاہیں وی اے حق نہ ݙیسن جو آپݨی چوری تے ریاست مدینہ دا ناں گھنو۔20:01