پاکستان اچ سرمایہ کاری سانڳے ماحول سازگار اے ، سرمایہ کاراں کوں تحفظ ݙیسوں،چیئرمین سینیٹ

اسلام آباد۔21جنوری(اے پی پی) چیئرمین سینیٹ سید یوسف رضا گیلانی آکھیے پاکستان اچ سرمایہ کاری سانڳے ماحول سازگار اے ، سرمایہ کاراں کوں تحفظ ݙیسوں ،پاکستان سویڈن نال تعلقات کوں قدر دی نگاہ نال ݙیکھدے ،کثیر الجہتی شعبیں اچ تعاون عوامی رابطے کوں ودھاوݨ اچ مددگار ثابت تھیسی ۔ سینیٹ سیکرٹریٹ توں جاری بیان موجب اے ڳالھ چیئرمین سینیٹ سویڈن دی سفیر الیگزینڈرا کانیل برخ نال اسلام آباد اچ ملاقات تے آکھی اے ۔چیئرمین سینیٹ آکھیے پاکستان سویڈن نال تعلقات کوں قدر دی نگاہ نال ݙیکھدے ، سویڈن نال سفارتی تعلقات 75سال تے محیط ، ݙینھ و ݙینھ تکڑے تھیندے پئن ،بین الاقوامی فورمز تے تعاون مثبت اے۔ یوسف رضا گیلانی آکھیے سرمایہ کاری سانڳے ماحول سازگار اے ، سرمایہ کاراں کوں تحفظ ݙیسوں ،زراعت ، تعلیم ، موسمیاتی تبدیلیاں سودھے مختلف شعبیں اچ تعاون سانڳے وسیع گنجائش موجود اے،پاکستان اچ چمڑے دی مصنوعات دی تیاری دی مہارت موجود اے۔ چیئرمین سینیٹ آکھیے کثیر الجہتی شعبیں اچ تعاون عوامی رابطے کوں ودھارا ݙیوݨ اچ مدد گار ثابت تھیسی ۔انہاں سفیر کوں سینیٹ دے کم دے طریقہ کار ، اہمیت ، آئینی کردار دا وی ݙسائے ۔سید یوسف رضا گیلانی آکھیے پارلیمانی سطح تے وفد دے تبادلے تکھے کرݨ ویلھے دی لوڑھ اے ،پاکستان دی سینیٹ اچ پاکستان سویڈن فرینڈشپ بݨایا ڳئے ،پارلیمانی وفد دے تبادلے توں عوام کوں مزید نیڑے گھن آوݨ اچ مدد ملسی ۔ انہاں آکھیے آئی پی یو اتے ٻئی سطح تے تعاون بہترین اے چیئرمین سینیٹ طالبیں سانڳے سکالرشپس ودھاوݨ دی تجویز ݙتی۔چیئرمین سینیٹ سویڈن کوں نیٹو دا رکن بݨݨ دی مبارخ ݙتی ، انہاں آکھیے اسلامو فوبیا دے ودھدے رجحان تے تشویش اے،چیئرمین سینیٹ سویڈن دی سفیر کوں ملتان دا دورہ کرݨ دی دعوت ݙیندے آکھیے ملتان تاریخی شہر اے ، مقامی صنعت اتے تجارت کوں ودھارا ݙے سڳدوں ۔ انہاں سفیر سانڳے نیک خواہشات دا اظہار کیتے۔