وزیراعظم دی صدارت اچ وفاقی کابینہ دا اجلاس ، یوٹیلیٹی سٹورز کارپوریشن دی نویں سروں تعمیر دا عمل تکھا کرݨ تے ایں عمل دی موثر نگرانی سانڳے کمیٹی بݨاݙتی

اسلام آباد۔21جنوری(اے پی پی) وزیراعظم یوٹیلیٹی سٹورز کارپوریشن دی نویں سروں تعمیر دا عمل تکھا کرݨ تے ایں عمل دی موثر نگرانی سانڳے کمیٹی بݨاݙتی جݙاں جو توشہ خانہ دے نظام اچ مزید شفافیت گھن آوݨ سانڳے توشہ خانہ ایکٹ 2024 تے نظر ثانی سانڳے وزیر دفاع خواجہ محمد آصف دی سربراہی اچ کمیٹی بݨاݙتی۔ وزیراعظم محمد شہباز شریف دی صدارت اچ وفاقی کابینہ دا وزیراعظم ہاؤس اچ تھیا ۔ وفاقی کابینہ کابینہ ڈویژن دی سفارش تے پاکستان اچ کم کرݨ آلے ٻاہرلے ملک دے موجودہ 86 پائلٹس دے لائسنسز دی توثیق اچ 2 سال اتے 2025 اچ نویں پائلٹس دی شمولیت دی فارن ویلیڈیشن اچ 3 سال دی توسیع دی منظوری ݙے ݙتی۔ وزیراعظم کوں ݙسایا ڳئے جو گزریل سال اچ کووڈ ۔19دی وبا تے پاکستانی پائلٹس تے پابندی پاروں پاکستانی ائیرلائنز کوں ٻاہرلے ملک توں پائلٹس دی خدمات گھنݨیاں پئن ۔ کابینہ ڈویژن دی مذکورہ بالا سفارش تے مکمل قانونی کارروائی دے بعد عملدرآمد کیتا ویسی ۔ وزیراعظم توشہ خانہ دے نظام اچ مزید شفافیت گھن آوݨ سانڳے توشہ خانہ ایکٹ 2024 تے نظر ثانی کیتے وزیر دفاع خواجہ محمد آصف دی سربراہی اچ کمیٹی بݨا ݙتی ۔وفاقی کابینہ کابینہ ڈویژن دی سفارش تے نیشنل سیڈ ڈویلپمنٹ اینڈ ریگولیٹری اتھارٹی دے چیئرمین تے ممبران دی تعیناتی دے حوالے نال قواعد وضوابط دی منظوری ݙے ݙتی۔وفاقی کابینہ کابینہ ڈویژن دی سفارش تے پریوینشن آف الیکٹرانک کرائمز ایکٹ 2016 دی ذمہ واری وزارت آئی ٹی توں وزارت داخلہ کوں منتقل کیتے ونڄݨ دے حوالے نال رولز آف بزنس 1973 اچ ترمیم دی منظوری ݙے ݙتی۔ وفاقی کابینہ وزارت قانون و انصاف دی سفارش تے نیشنل الیکٹرک پاور ریگولیٹری اتھارٹی اپیلیٹ ٹربیونل دے ممبر فنانس دے طور تے ڈاکٹر عمار حبیب خان دی تعیناتی دی منظوری ݙے ݙتی۔ وزیراعظم یوٹیلیٹی سٹورز کار پو ر یشن دی نویں سروں تعمیر دے عمل کوں تکھا کرݨ تے ایندی مؤثر نگرانی سانڳے کمیٹی بݨاݙتی ۔ وزیراعظم آکھیے پرائم منسٹر ریلیف پیکیج مستحقین تئیں پڄاوݨ سانڳے نویں مؤثر حکمت عملی بݨائی ونڄے۔وفاقی کابینہ اقتصادی رابطہ کمیٹی دے 6 جنوری 2025 اتے 17 جنوری 2025 دے اجلاس اچ کیتے ڳئے فیصلیں دی توثیق کرݙتی