ھک سو 90 ملین پائونڈ میگا کرپشن کیس اچ ناقابل تردید ثبوت موجود ہن، شہزاد اکبر اے پیسہ آفیشل دستاویزات اچ شو کروائے، بانی چیئرمین پی ٹی آئی اپݨی کرپشن دا جواب ݙیون ، وفاقی وزیر اطلاعات عطاءاللہ تارڑ

اسلام آباد۔22جنوری(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے ھک سو 90 ملین پائونڈ میگا کرپشن کیس اچ ناقابل تردید ثبوت موجود ہن ، این سی اے اے رقم ضبط کرتے حکومت پاکستان دے حوالے کیتی، بند لفافہ کابینہ اچ گھن آیا ڳیا ، شہزاد اکبر پیسہ آفیشل دستاویزات اچ شو کروائے، بانی چیئرمین پی ٹی آئی اپݨی کرپشن دا جواب ݙیون۔ 190 ملین پائونڈ میگا کرپشن تے خصوصی ڳالھ مہاڑ کریندے وفاقی وزیر اطلاعات آکھیے 190 ملین پائونڈ دے فیصلے کوں عالمی میڈیا کرپشنز دی ہیڈ لائنزݙتن ، ایں کیس دے پکے ثبوت ہن ، نیشنل کرائم ایجنسی توں کرائم پروسیڈ دے ذریعے پیسہ حکومت پاکستان کوں آئے ، شہزاد اکبر ایسٹ ریکوری یونٹ اچ 190 ملین پائونڈ کوں سرکاری دستاویز دے اندر ظاہر کروائے تے کابینہ کوں ای ایہو ݙسایا ڳئے جو اے پیسہ ملک ریاض اتے انہاں دی فیملی توں ضبط کرتے حکومت پاکستان کوں ݙتا ڳئے ، جݙاں اے رقم حکومت پاکستان کوں ݙتی ڳئی شہزاد اکبروی تسلیم کرڳھدا تاں ایں وچ کوئی ابہام نی رہندا ۔ انہاں بند لفافہ کابینہ اچ گھن آئے تے ایں پیسے کوں سپریم کورٹ دے اکائونٹ اچ کہیں ݙوجھے جرمانے دی مد اچ ادا کرݙتے ۔ انہاں آکھیے میاں بیوی ٹرسٹ بݨائے، رشوت اچ ݙو سوکنال زمین ڳھدی، مندریاں منڳیاں ، ایں توں وݙی کرپشن دی مثال نی ملدی ۔ عطاءاللہ تارڑ آکھیے 190 ملین پائونڈ میگا کرپشن دے ناقابل تردید ثبوت موجود ہن ، اے پاکستان دی تاریخ دا ساریں توں وݙا کرپشن اتے رشوت دا کیس اے، اے ساریاں چیزاں دستاویزات نال ثابت تھی چکن ۔ انہاں آکھیے سپریم کورٹ وی اپݨے آرڈر اچ آکھیے جو ھک ہتھ توں پیسہ گھن تے ݙوجھے ہتھ اچ ݙے ݙتا ڳیا ، اے پیسہ حکومت پاکستان اتے پاکستان دے عوام دا ہئی جیں دا غلط استعمال کیتا ڳئے ۔ وزیر اطلاعات آکھیے ملک ریاض اتے انہاں دے پتر دے خلاف بدعنوانی اتے زمیناں تے قبضے دے ٻہوں کیس چلدے پئن جیں اچ راولپنڈی دے علاقے تخت پڑی اچ ناجائز قبضے اتے غیر قانونی ہائوسنگ سوسائٹی اتے عوام توں ارباں روپے ٻٹورݨ دے کیس شامل ہن ۔ انہاں آکھیے نیب دی طرفوں پریس ریلیز جاری تھیوݨ دے باوجود دبئی اچ پراجیکٹ لانچ کیتے ویندے پئن ، نیب واضح کیتے جو دبئی دے پراجیکٹ اچ جیڑھا وی پیسہ لڳسی او منی لانڈرنگ دے زمرے اچ آسی ، متحدہ عرب امارات دی حکومت نال ای اے معاملہ چاتا ویسی جو حکومت ایں تے ایکشن گھنے، نیب انہاں کوں مفرور ڈیکلیئر کیتے، جے اے آپݨے آپ دا دفاع کرسڳدن تاں 190 ملین پائونڈ کرپشن کیس اچ وی عدالت دے سامنے کھڑے تھیندے ۔انہاں پہلے وی عدالتاں توں راہ فرار اختیار کیتی، عدالتاں دے سامنے پیش نی تھئے ، انھاں دی جائیداداں پہلے وی ضبط تھئن ، نیب باقی کیسز دے اندر وی جائیداد ضبط کرݨ دے حوالے نال کارروائی کریندا پئے۔ انہاں آکھیے نیب عوام کوں ݙسائے جو دبئی پراجیکٹ اچ سرمایہ کاری منی لانڈرنگ دے زمرے اچ آسی لہذا ایں وچ سرمایہ کاری نہ کیتی ونڄے ۔ انہاں آکھیے نیب اچ کئی کیسز موجود ہن، ایں حوالے نال عدالت دے سامݨے کہیں قسم دا کوئی ڈیفنس پیش نی کیتا ویندا پیا ، 190 ملین پائونڈ کیس اچ وی اے مفرور تھی چکن تاں اڳوں وی قانونی کارروائی مکمل تھیوݨی چاہیدی اے ۔ اے نی ݙیکھݨا چاہید جو کون کیڑھی پوزیشن وچ اے یا کیں کنے کتنا پیسہ اے۔ ملک ریاض اتے باقی لوکاں دے خلاف ٻہوں ثبوت تے کیس موجود ہن انہاں کوں چاہیدے عدالتاں اچ آپݨے کیساں دا سامݨا کرن جیں اچ او ناکام رہین ۔ وفاقی وزیر آکھیے نیب قانون موجب کم کریندا پئے اے پہلی واری تھئے جو بااثر لوکاں تے نیب سارے قانونی لوازمات پورے کریندے ثبوتاں دی بنیاد تے ہتھ پات ، برطانیہ دی حکومت جرمانے دے طور تے ملک ریاض اتے علی ریاض ملک دے ویزے منسوخ کیتے جیڑھے جو کریمنل پروسیڈنگز دے بغیر ممکن کائناں ہئی ۔ انہاں برطانیہ اچ آپݨے ویزے بحال کراوݨ سانڳے کیس فائل کیتا، برطانیہ دی حکومت جݙاں تئیں کہیں دے خلاف کوئی چیز ثابت نہ تھی ونڄے تاں ایں ویلھے تئیں کہیں دا ویزہ منسوخ نی کریندی ایں دا مطلب اے جو پیسے ضبط کیتے ڳئے ہن او حکومت پاکستان دی ملکیت ہن او ضبط کرتے حکومت پاکستان کوں ݙتے ڳئن  وفاقی وزیر آکھیے پی ٹی آئی آلے سیاست کوں مذہب توں ٻاہر رکھن ، بانی چیئرمین پی ٹی آئی اپنی کرپشن اتے رشوت دا جواب ݙیون ، مذہب دے پچھوں لک تے آپݨے ݙراوݨے جرم لکاوݨ دی کوشش نہ کرن۔