دانش سکولاں توں ملک اچ تعلیمی انقلاب آسی ، وزیراعظم محمد شہباز شریف دا آزاد کشمیر اچ پہلے دانش سکول دا سنگ بنیاد رکھݨ دی تقریب توں خطاب

بھمبر ۔22جنوری(اے پی پی) وزیراعظم محمد شہباز شریف آکھیے دانش سکولاں توں ملک اچ تعلیمی انقلاب آسی ، دانش سکول اچ مفت کتاباں ،کھاݨا اتے رہائش ݙتی ویندی اے ۔ آزاد کشمیر اچ دانش سکولاں دا ڄال وچھیسوں ، ملک توں دہشت گردی مکاوݨ سانڳے بغیر ترقی تے خوشحالی دا پیتھا نہ چلسی ، ملک دے خلاف سازشاں کرݨ آلے ناکام تھیسن۔ اے ڳالھ انہاں آزاد کشمیر اچ پہلے دانش سکول سائنس اینڈ ٹیکنالوجی سینٹر آف ایکسیلنس بھمبر دا سنگ بنیاد رکھݨ دی تقریب توں خطاب کریندے آکھی۔وزیراعظم محمد شہباز شریف آکھیے آزاد کشمیراچ  دانش سکولاں دا قیام خوش آئند اے، دانش سکول دی بنیاد پنجاب دے پسماندہ علاقیں دے ذہین اتے باصلاحیت طالبیں سانگے رکھی ڳئی جنھاں دے والدین کنے تعلیمی خرچے سانڳے وسائل کائناں ہن ، ہزاراں ٻال دانش سکولاں توں تعلیم گھن تے مختلف شعبیں اچ نمایاں خدمات سر انجام ݙیندے پئن ، اے دانش سکول کشمیریاں سانڳے علم ودانش دا گہوارہ بݨسی ۔انہاں آکھیے مقبوضہ کشمیر دے عوام اپݨی آزادی دی جنگ لڑدے پئن ، انہاں کوں وی ایں منصوبے توں خوشی تھیسی انہاں دے کشمیری بھرا اتھاں اعلی معیار دی تعلیم حاصل کریندے پئن اساکوں ادراک کرݨا ہوسی مقبوضہ کشمیر اچ تعلیم داحصول کتنا اوکھا اے ۔انہاں آکھیے باصلاحیت یتیم اتے غریب ٻال دانش سکول اچ معیاری تعلیم گھندے پئن ایں توں ملک اچ تعلیمی انقلاب آسی ، دانش سکول اچ مفت کتاباں ،کھاݨا اتےرہائش ݙتی ویسی ۔وزیراعظم آکھیے آزاد کشمیر دے جنھاں علاقیں اچ تعلیم و تربیت دیاں سہولتاں میسر کائنی اتھاں دانش سکولاں داڄال وچھیسوں ، چھوہر تے چھوہریں کوں انڄ انڄ معیاری سہولتاں ݙتیاں ویسن ، یتیم اتے جنھاں ٻالاں دے والدین اعلی تعلیم نی ݙیوا سڳدے او ٻال اتھاں آتے تعلیم حاصل کریسن ، نیلم سودھے ٻئے علاقیں اچ اے سکول وختی شروع تھیسن۔ انہاں آکھیے دانش سکول سانڳے سارے فنڈز وفاقی حکومت ادا کریسی ۔ انہاں متعلقہ حکام کوں اے سکول ھک سال اچ فعال کرݨ دی ہدایت کیتی ۔ انہاں آکھیے صوبہ پنجاب ،سندھ اتے بلوچستان دے وزراء اعلیٰ تعلیم و صحت دی بہترین سہولتاں ݙیوݨ سانڳے اقدامات کریندے پئن ، گلگت بلتستان اتے بلوچستان اچ وی دانش سکول بݨائے ویسن ۔وزیراعظم آکھیے بھارتی فوج مقبوضہ کشمیر اچ ظلم وبربریت دی انتہا کرݙتی ، جݙاں تئیں اقوام متحدہ دی قرارداداں موجب کشمیریاں کوں انہاں دا حق خودارادیت نی مل ویندا تے آزادی دا سجھ نی ابھردا ، انھاں دی سیاسی، اخلاقی اتے سفارتی حمایت جاری رکھیسوں ، پاک فوج دے سپہ سالارجنرل سید عاصم منیر کشمیری بھراویں دی حمایت داغیر متزلزل عزم رکھیندن ، کشمیریاں دی قربانیاں ضائع نہ ویسن ، انھاں کوں آزادی ملسی ۔ انہاں آکھیے موجودہ حکومت دے اقدامات پاروں مہانگ تے شرح سود اچ کمی آئی اے ، برآمدات اتے ترسیلات زراچ ودھارا تھئے ، عالمی بینک پاکستان اچ مختلف منصوبیں سانڳے 20 ارب ڈالر مختص کیتن ۔وزیراعظم آکھیے اساں ملک کوں دیوالیہ تھیوݨ توں بچائے ، ھک مٹھ تھی تے اوکھ دا سامݨا کریندے پیوں ، آئی ایم ایف نال پروگرام کامیابی نال مکمل کریسوں ۔انہاں آکھیے جݙاں تئیں ملک توں دہشت گردی دا خاتمہ نہ تھیسی تے ملک دی ترقی تے خوشحالی دا پھیتا نہ چلسی ، افواج پاکستان اتے سکیورٹی فورسز دہشت گردی دے خلاف جنگ اچ وݙیاں قربانیاں ݙیندے پئن اساکوں ایندا اعتراف کرݨا چاہیدے ۔انتشار توں ملک کوں روزانہ 190 ارب دا ضیان تھیندے ، ملک دے خلاف سازشاں کرݨ آلے ناکام تھیسن ۔ وزیراعظم آزاد کشمیر انوار الحق آکھیے وزیراعظم محمد شہباز شریف بھمبر  جیھے پسماندہ ضلع اچ دانش سکول بݨا تے علم دی شمع روشن کیتی اے انہاں دا کریڈٹ اے،ایں عظیم منصوبے دے آغاز تے انہاں دے شکر گزار ہیسے، اے گیم چینجر منصوبہ اے، پاکستان اتے کشمیری عوام دا رشتہ کلمہ طیبہ تے استوار اے، اے رشتہ مستقبل اچ مزید تکڑا تھیسی ۔بھارتی ریاستی دہشت گردی داکشمیری ھک مٹھ تھی تے مقابلہ کریسن ۔بھارت مقبوضہ کشمیر اچ ظلم و ستم اتے انسانی حقوق دی خلاف ورزیاں توں توجہ ہٹاوݨ سانڳے پروپیگنڈا کریندا پئے وفاقی وزیر امور کشمیر وگلگت بلتستان امیر مقام آکھیےآزاد کشمیر اچ دانش سکول دا منصوبہ شروع کرݨ تے وزیراعظم دے شکر گزار ہیسے، آزادکشمیر اچ 4دانش سکول بݨائے ویسن ۔ وفاقی وزیر خالد مقبول صدیقی آکھیے اڄ کشمیر اچ دانش سکولاں دا آغاز کرݙتے ، تعلیمی ترقی نال قوماں ترقی کریندن ، وزیراعظم محمد شہباز شریف دی سوچ موجب ملک اچ جدید تعلیم دے ودھارے سانڳے کوشاں اے ۔

ایں موقع تے پنجاب اچ دانش سکولاں متعلق دستاویزی فلم وی ݙکھائی ڳئی۔تقریب اچ وزیراعظم آزاد جموں و کشمیر انوارلحق،وفاقی وزیر اطلاعات و نشریات عطاء اللہ تارڑ،وفاقی وزیر امور کشمیر وگلگت بلتستان انجینئر امیر مقام،وفاقی وزیر پیشہ ورانہ تعلیم و تربیت خالد مقبول صدیقی،وزیراعظم دے مشیر سیاسی امور رانا ثناء اللہ ،چیئرمین وزیر اعظم یوتھ پروگرام رانا مشہود احمد خاں ، آزادکشمیر دی قانون ساز اسمبلی دے وزراء،ارکان تے حریت قیادت شرکت کیتی۔ایں موقع تے وزیراعظم محمد شہباز شریف تقریب اچ موجود حریت رہنماواں توں پرتپاک اندازاچ  فرداًفرداًمصافحہ وی کیتے۔