وفاقی وزیر رانا تنویر حسین دی صدارت اچ نیشنل سیڈ ڈویلپمنٹ اینڈ ریگولیٹری اتھارٹی دے بورڈ آف گورنرز دا اجلاس

اسلام آباد۔22جنوری(اے پی پی) وفاقی وزیر قومی غذائی تحفظ و تحقیق  رانا تنویر حسین  دی صدارت اچ نیشنل سیڈ ڈویلپمنٹ اینڈ ریگولیٹری اتھارٹی (این ایس ڈی آر اے ) دے بورڈ آف گورنرز دا اجلاس تھئے۔ اجلاس دا مقصد بیج دے شعبہ اچ بہتری سانڳے اتھارٹی دی مکمل فعالیت تے غور کرݨ ہئی ۔ سیڈ ترمیمی ایکٹ 2024 دے تحت نیشنل سیڈ ڈویلپمنٹ اینڈ ریگولیٹری اتھارٹی دے قیام دا مقصد بیج دے شعبہ دے مسئلیں کوں حل کرݨ تے ایندی بہتری سانڳے کم کرݨا اے ۔  اتھارٹی دے فرائض اچ بیج سیکٹرسانڳے پالیسی تشکیل ݙیوݨ ، بیج دے معیار دی نگرانی اتے وفاقی حکومت کوں سفارشات ݙیوݨ شامل ہن۔ وفاقی وزیر رانا تنویر حسین آکھیے معیاری بیج زرعی پیداوار کوں ودھاوݨ تے خوراک دی حفاظت یقینی بݨاوݨ اچ اہم کردار نبھیندن ۔ انہاں ایں ڳالھ تے زور ݙتے جو جدید اتے برآمدی معیار دے بج خود کفالت گھنݨ تے برآمدات کوں ودھارا ݙیوݨ سانڳے ضروری ہن۔ اجلاس اچ اتھارٹی دی انتظامی ساخت، وژن اتے سٹریٹجک اہداف تے تفصیلی ڳالھ مہاڑ تھئی ۔ نیشنل سیڈ ڈویلپمنٹ اینڈ ریگولیٹری اتھارٹی دا وژن ھک مسابقتی بج سیکٹر کوں ودھارا ݙیوݨ اے جیڑھے جدت، سرمایہ کاری اتے جدید ٹیکنالوجی تے مبنی ہووے۔ سٹریٹجک اہداف اچ بج دے معیار کوں بہتر بݨاوݨ ، درآمدات اچ کمی، برآمدات اچ ودھارا ، اتے کساناں دی آمدنی اچ بہتری شامل ہن۔ اتھارٹی جراثیم کش بیج، جدید ٹیکنالوجی، سپلائی چین اتے ریگولیٹری فریم ورک تےفوکس کریسی ۔ نیشنل سیڈ پالیسی کوں وی حتمی شکل ݙے ݙتی ڳئی اے جیں دے تحت اتھارٹی ہر سطح تے صوبیں دی مدد کریسی ۔ اجلاس دے اختتام تے وفاقی وزیر بج سیکٹر کوں تکڑا بݨاوݨ سانڳے وزارت دا عزم کیتے۔