سپریم کورٹ آف پاکستان دے ست رکنی آئینی بنچ اچ جبری گمشدگیاں دے کیس دی سماعت

اسلام آباد۔22جنوری(اے پی پی) سپریم کورٹ آف پاکستان دے ست رکنی آئینی بنچ جبری گمشدگیاں دے کیس دی سماعت کیتی۔ جسٹس امین الدین خان دی سربراہی اچ آئینی بنچ جسٹس جمال خان مندوخیل، جسٹس محمد علی مظہر، جسٹس حسن اظہر رضوی، جسٹس مسرت ہلالی، جسٹس نعیم اختر افغان اتے جسٹس شاہد بلال حسن تے مشتمل اے۔جبری گمشدگیاں اتے لاپتہ لوکاں متعلق کیس دی سماعت دے موقع تے ایڈیشنل اٹارنی جنرل عامر رحمان عدالت کوں ݙسائے حکومت لاپتہ لوکاں دے معاملے دے حل سانڳے خصوصی ٹریبونل بݨاوݨ چاہندی اے تے ایں معاملے کوں ہمیشہ سانڳے حل کرݨ کیتے قانون سازی تے کم جاری اے ۔ایڈیشنل اٹارنی جنرل عامر رحمان عدالت کوں مزید  ݙسائے جسٹس (ر) فقیر محمد کھوکھر کوں جبری گمشدگی تے انکوائری کمیشن (سی آئی ای ڈی) دا چیئرمین مقرر کیتا ڳئے تے ایں سلسلے اچ قانون سازی کیتے وفاقی کابینہ دی ھک کمیٹی بݨاݙتی ڳئی اے۔قانون سازی کیتے ٹائم فریم بارے جسٹس محمد علی مظہر دے پچھݨ تے ایڈیشنل اٹارنی جنرل جواب ݙتا جو کابینہ کمیٹی ایں تے کم کریندی پئی اے ۔جسٹس جمال مندوخیل ریمارکس ݙتے جو قانون پہلے توں موجود اے، کہیں ملزم تے عدالت اچ مقدمہ چلیسوں جے او مشتبہ اے تاں ایں کوں رہا کرݨ ݙیون بصورت بیا قانون واضح اے۔ایڈیشنل اٹارنی جنرل آکھیے حکومت ایں مسئلے کوں ہمیشہ سانڳے حل کرݨ کیتے پرعزم اے ۔جسٹس مندوخیل ریمارکس ݙتن جو اساں امید کر سڳدوں جو مسئلہ حل تھی ویسی ، پارلیمنٹ کوں ایں معاملے تے قانون سازی دی ہدایت نی کرسڳدے ۔بعد اچ سماعت آندی تاریخ تئیں ملتوی کرݙتی ڳئی۔