مصنوعی ذہانت دا ذمہ دارانہ استعمال تعلیمی نظام اچ انقلاب برپا کرݨ دی صلاحیت رکھیندے ، صدرآصف علی زرداری

اسلام آباد۔24جنوری(اے پی پی) صدر مملکت آصف علی زرداری تعلیمی نظام کوں پیش چیلنجاں نال نبݨݨ دی لوڑھ تے زور ݙیندے آکھیے تعلیم کوں ھک خوشحال، ہمہ گیر تے ترقی پسند پاکستان دی بنیاد بݨاوݨ سانڳے رل تے کم کرݨا ہوسی ۔ ایوانِ صدر دے پریس ونگ موجب صدر مملکت اے ڳالھ عالمی یومِ تعلیم دے موقع تے آپݨے سنھیے اچ آکھی ۔ انہاں آکھیے ”مصنوعی ذہانت اتے تعلیم: آٹومیشن دی دنیا اچ انسانی ارادہ و اختیار دا تحفظ“ دے عنوان دے تحت عالمی یومِ تعلیم منیندے پیوں ۔ صدر مملکت آکھیے مصنوعی ذہانت دا ذمہ دارانہ استعمال تعلیمی نظام اچ انقلاب برپا کرݨ دی صلاحیت رکھیندے ، مصنوعی ذہانت دی دنیا اچ انسانی ارادہ و اختیار، تخلیقی صلاحیت، تنقیدی سوچ اتے فیصلہ سازی کوں مقدم رہݨا چاہیدے ، مصنوعی ذہانت تے مبنی ٹولز سکھݨ دے عمل کوں انفرادی ضروریات موجب ڈھالݨ اچ مدد ݙے سڳدوں ، مصنوعی ذہانت دے ٹولز دی مدد نال تعلیمی نظام اچ ڈیٹا تے مبنی اصلاحات گھن آئیاں ونڄ سڳدن ۔ صدر مملکت آکھیے مصنوعی ذہانت دی صلاحیتاں توں فیدہ چاوݨ سانڳے اساکوں تعلیمی انفراسٹرکچر تے سرمایہ کاری کوں ترجیح ݙیوݨی ہوسی تعلیمی نظام کوں پیش ٻئے مستقل چیلنجاں نال وی نبݨݨ دی لوڑھ اے ۔ صدر آصف علی زرداری آکھیے اساکوں آپݨے تعلیمی نظام اچ بہتری گھن آوݨ سانڳے مصنوعی ذہانت دا استعمال کرݨا چاہیدے، ماہرین ِتعلیم، پالیسی ساز اتے والدین مصنوعی ذہانت اتے تعلیم ݙیوݨ دے جدید طریقے اپناون ۔ صدر مملکت آکھیے مصنوعی ذہانت توں مسئلیں د حل تے تخلیقی صلاحیتاں دے ودھارے اچ مدد مل سڳدی اے ، ریاضی، سائنس، زبان، تاریخ تے تنقیدی سوچ دی بنیادی مہارتاں ودھاوݨ اچ مدد ملسی ، مصنوعی ذہانت تے مبنی ٹولز طلبا کوں زبان و بیان ، ٹیم ورک اتے ڈیجیٹل خواندگی جیھاں ضروری مہارتاں نال لیس کرسڳدن ۔ صدر مملکت آکھیے آؤ آپݨے ٻالاں تے سرمایہ کاری کرݨ تے انہاں کوں ضروری مہارتاں نال آراستہ کرݨ دا عہد کروں۔