یونیورسٹی آف لندن توں سند یافتہ لوک اڄ ملک دے اہم شعبیں اچ کلیدی کردار ادا کریندے پئن ، وفاقی وزیر اطلاعات عطا اللہ تارڑ

اسلام آباد۔25جنوری(اے پی پی) وفاقی وزیر اطلاعات، نشریات، قومی ورثہ و ثقافت عطا اللہ تارڑ پاکستان دے تعلیمی نظام اتے قانون دی تعلیم دا معیار اچا کرݨ اچ یونیورسٹی آف لندن دے بے مثال کردار دی تعریف کریندے آکھیے یونیورسٹی آف لندن توں سند یافتہ لوک اڄ ملک اچ عدلیہ، قانون، سیاست سودھے اہم شعبیں اچ آپݨی خدمات انجاݨ ݙیندے پئن ، یونیورسٹی آف لندن دا تعلیمی نظام سکھݨ دا بہترین تجربہ ݙیندے ۔ اے ڳالھ انہاں یونیورسٹی آف لندن دے المنائی توں خطاب کریندے آکھی ۔ ایں موقع تے سپریم کورٹ آف پاکستان دی پہلی خاتون جج جسٹس عائشہ ملک، یونیورسٹی آف لندن دی وائس چانسلر پروفیسر وینڈی تھامسن اتے ٻئے موجود ہن ۔ تقریب توں خطاب کریندے وفاقی وزیر اطلاعات آکھیے انہاں آپݨے کیریئر دا آغاز یونیورسٹی آف لندن توں بطور ٹیوٹر کیتا، اے میݙے کیریئر دے ابتدائی سال ہن۔ یونیورسٹی دے ٻاہرلے پروگراماں طلبا اچ تنقیدی سوچ، تجزیہ کرݨ تے قانونی مہارتاں دی ترقی کوں ودھارا ݙتا ۔ یونیورسٹی آف لندن توں سند یافتہ لوک اڄ ملک دے اہم شعبیں اچ کلیدی کردار نبھیندے پئن ۔ انہاں اچوں کئی وݙی لاءفرمز اچ شراکت دار بݨ چکن ، عدلیہ اچ رلئن تے جھیڑیں دے متبادل حل دے نظام اچ آپݨا تعاون کریندے پئن ، ایں توں انڄ یونیورسٹی آف لندن دے ٻہوں سارے فارغ التحصیل لوک سیاست اتے سماجی کماں اچ مصروف ہن جیڑھے جو انہاں دی قوم سانڳے جڑت کوں ظاہر کریندے ۔ وفاقی وزیر آکھیے انہاں ساریاں کامیابیاں توں ظاہر تھیندے جو یونیورسٹی آف لندن پاکستان دی ترقی اچ اہم کردار نبھائے ، اے ڳالھ قابل ذکر اے جو پاکستان اچ قانون دا پیشہ معزز مقام رکھیندے ۔ بانی پاکستان قائداعظم محمد علی جناحؒ اتے عظیم مفکر و شاعر ڈاکٹر علامہ محمد اقبالؒ برطانیہ دے عظیم ادارے ”لنکنز ان“توں تعلیم ڳھدی انہاں ݙوہیں عظیم شخصیات اپݨی قانونی مہارت اتے سیاسی بصیرت دے ذریعے پاکستان دے قیام اتے ایندے مستقبل دی تشکیل اچ اہم کردار نبھائے ایں توں ظاہر تھیندے جو قانونی مہارت ملک دی بنیاداں اچ اہم کردار ادا کریندی اے ، یونیورسٹی آف لندن دا المنائی نیٹ ورک گزریل کئی ݙھاکیں توں مسلسل ترقی کریندا پئے امید اے جو مستقبل اچ مزید ترقی کریسی ۔ وفاقی وزیر اطلاعات روٹس سکول سسٹم دی سی ای او ڈاکٹر خدیجہ کوں شعبہ تعلیم اچ نمایاں خدمات انجام ݙیوݨ تے خراج تحسین پیش کریندے آکھیے خواتین لیڈرز دا اڳوں آوݨ حوصلہ افزا اے، اے خوشی دے ڳالھ اے جو تریمتاں مختلف شعبیں اچ قائدانہ کردار نبھیندیاں پئن انہاں آکھیے ساݙے معاشرے اچ تریمتاں کوں زندگی دے آغاز توں ہی اوکھ دا سامݨا کرݨا پوندے ۔ عطاءاللہ تارڑ یونیورسٹی آف لندن دی تریمت گریجویٹس دی تعداد اچ ودھارے تے خوشی دا اظہار کریندے یونیورسٹی آف لندن دا تعلیمی نظام سکھݨ دا بہترین تجربہ ݙیندے جیں توں طالب علماں کوں پیشہ ورانہ میدان اچ کامیاب تھیوݨ اچ مدد ملدی اے ۔ ایں موقع تے وفاقی وزیر اطلاعات یونیورسٹی آف لندن دے عظیم پروفیسرز تے اساتذہ کرام کوں خراج تحسین پیش کیتا۔