اسلام آباد۔1مارچ(اے پی پی) وفاقی وزیر تجارت جام کمال خان تاشقند فارما پارک دا دورہ کیتے جتھاں انہاں پاکستان اتے ازبکستان وچال دواسازی دے شعبے اچ تعاون دے امکانات دا جائزہ ڳھدے۔ انہاں دے رلے ازبکستان دے وزیر سرمایہ کاری، صنعت تے تجارت، لازیز قدرت اوف تے پاکستان دے سفارت خانے اچ تعینات ٹریڈ اینڈ انویسٹمنٹ کونسلرعطا اللہ وی موجود ہن۔وفد دا استقبال فارما ایجنسی ازبکستان دے چیئرمین،عبداللہ عزیزوف کیتے، جنہاں پارک دی تاریخ، کامیابیاں اتے دواسازی دی صنعتاں کوں ݙتیاں ونڄݨ آلیاں سہولتاں تے تفصیلی بریفنگ ݙتی۔ وزیر تجارت پارک دے مختلف شعبیں دا دورہ کیتے تے ایں دے جدید انفراسٹرکچر اتے تحقیقی صلاحیتاں دا جائزہ ڳھدا۔ایں موقع تے وزیر تجارت جام کمال خان تاشقند فارما پارک اتے پاکستانی طبی جامعات، اتے ہربل میڈیسن انڈسٹریز وچال تعاون دے وسیع موقع تے زور ݙتے انہاں ݙوہیں ملکاں وچال صحت اتے دواسازی دے شعبے اچ تعلقات کوں مزید تکڑا بݨاوݨ دی لوڑھ تے روشنی پاتی تاں جو تحقیق، پیداوار اتے تجارت کوں ودھارا ݙتا ونڄ سڳے ۔وزیر تجارت پارک اچ موجود جدید ویئرہاؤس دیاں سہولتاں دا وی معائنہ کیتا تے اتھاں دستیاب ذخیرہ اندوزی اتے لاجسٹک سہولتاں دا جائزہ ڳھدا ۔ اے دورہ پاکستان اتے ازبکستان وچال تجارتی اتے سرمایہ کاری خاص طور تے دوا سازی دے ودھدے شعبے اچ تعلقات کوں مزید ودھاوݨ دے عزم کوں ظاہر کریندے۔
