ایف آئی اے دی مراکش ٻیڑی حادثہ 2025 اچ ملوث انسانی اسمگلرز دے خلاف وݙی کارروائی ، منظم گینگ دا اہم کارندہ گرفتار

اسلام آباد۔1مارچ(اے پی پی) ایف آئی اے مراکش ٻیڑی حادثہ 2025 اچ ملوث انسانی اسمگلرز دے خلاف وݙی کارروائی کریندے منظم گینگ دا اہم کارندہ گرفتار کرڳھدے۔ ترجمان ایف آئی اے  توں جاری بیان موجب ایف آئی اے فیصل آباد دا انسانی اسمگلنگ اچ ملوث عناصر دے خلاف کریک ڈاؤن جاری اے ۔ ایف آئی اے مراکش ٻیڑی حادثہ اچ ملوث منظم گینگ دا اہم کارندہ گرفتارکرڳھدے ، گرفتار ملزم دی شناخت امیر علی  دے ناں توں تھئی اے ، ملزم کوں ٹوبہ ٹیک سنگھ  توں گرفتار کیتا ڳئے ، ملزم ٹوبہ ٹیک سنگھ دے رہائشی انس علی شہری کوں غیر قانونی یورپ بھجواوݨ دی کوشش کیتی ، ایں توں پہلے وی مذکورہ گینگ دا ملزم جاوید احمد گرفتار تھی چکیے ، ملزمان شہریاں کوں ٻاہرلے ملک ملازمت دا جھانسہ ݙے تے لکھاں روپے ٻٹورݨ اچ ملوث پاتے ڳئن ۔ ملزمان شہری کوں اسپین بھجواوݨ سانڳے 35 لکھ روپے وصول کیتن ، ملزم شہری کوں قانونی طریقے نال بھیجݨ دی بجائے ٻیڑی دے ذریعے یورپ بھجواوݨ دی کوشش کیتی ، شہری مراکش ٻیڑی حادثہ 2025 اچ زندہ بچ وںڄݨ آلیں اچ شامل اے ، ملزم امیر علی موریطانیہ اچ رہݨ آلے انسانی اسمگلر عبدالغفارتے افریقی لینڈ روٹ ایجنٹ ابوبکر نال رابطہ وچ ہئی، ملزم ٻئے ایجنٹاں نال رل تے پاکستانی شہریاں کوں اسپین بھجواوݨ دا جھانسہ ݙتا، ملزم شہریاں کوں ٻیڑی دے ذریعے موریطانیہ توں یورپ بھجواوݨ دی کوشش کیتی ، یورپ غیر قانونی طور تے داخلے دی کوشش اچ ٻیڑی دا حادثہ تھئے، ملزمان اتے ٻئے ایجنٹاں مہاجرین کوں سمندراچ بے یار و مددگار چھوڑݙتا، حادثے دے نتیجے اچ کئی پاکستانی شہریاں دی موت واقع تھئی ۔ ترجمان آکھیے ملزم کوں گرفتار کر تے تفتیش شروع کرݙتی ڳئی اے ، ملزمان دے ٻئے ساتھیاں دے خلاف کاروائیاں جاری ہن ، مذکورہ گینگ دے ملزمان دی انٹرپول دی مدد نال گرفتاری عمل اچ گھن آئی ویندی پئی اے ۔ ڈائریکٹر فیصل آباد زون آکھیے انسانی سمگلنگ اچ ملوث عناصر دے خلاف کریک ڈاون جاری اے، انسانی سمگلنگ دے نیٹ ورک دے خلاف کارروائیاں مزید تکھیاں کرݙتن ، نشوم شہریاں دیاں جاناں نال کھیݙݨ آلیں کوں انصاف دی کچاری اچ گھن آیا ویسی ۔ انہاں آکھیے بین الاقوامی سطح تے انسانی سمگلنگ دے نیٹ ورک کوں منڈھوں مُکایا ویسی۔